Thursday, June 5, 2008

وبدل النكسه

انا كنت ناوي اني اعمل موضوع عن النكسه بمناسبة مرور 41 سنه علي الذكري الاليمه دي
لكن كما قال نجيب سرور والله لتحصل بدال النكسه ميت نكسه
وحتي في ذكري النكسه في سنة 2008 نكسه جديده
نكسه اصابت مصر اسمها الاهمال اسمها الفساد اسمها اي اسم مش مهم الاسم المهم انها للاسف مش اول نكسه ولا اخر نكسه
في ظل الغلاء الفاحش والفساد الفاحش ضاع المواطن الغلبان في النص وبقا خلاص مش عارف يعمل ايه وياكل ولاده اذاي
السيد وزير الصحه ابقاه الله واطال عمره في زياره له لمستشفي حكومي قابل موظف يعمل في عربة الاسعاف فسئله الوزير
بتاخد مرتب قد ايه قاله الموظف 250 جنيه قاله وبتاخد بقشيش قد ايه قاله قدهم قاله يعني بتقبض في الشهر 500 جنيه
يا بختك يا عم
شفتم المهزله
وصل الامر ان الوزير يشجع حتي المسعف في عربات الاسعاف علي المطالبه بالبقشيش
واعتبارها حق من حقوقه طبعا دي نكسه بكل المقاييس
ولما يجي عامل كهربائي في مستشفي المطريه التعليمي يسيب ورديته ويروح يدور علي اي شغلانه تانيه يجيب منها فلوس ياكل بيها ولاده يبقا مش حرام عليه
مهو هيجيب منين يموت ولا يموت ولاده علشان يعيش بالمرتب الاي مش بيجيب عيش ولا بيكفي مواصلات
مهو للاسف مش بياخد بقشيش ولا بيمد ايده زي الممرضات ولا المسعفين ولا اي حد تاني في المستشفي
بس للاسف عامل الكهربه ده بدل ما يموت ولاده او يموت نفسه علشان يجيب اكل لولاده
ساب ورديته وراح يعمل اي مصلحه تجيب له اي فلوس واتقطع النور في المستشفي
وكانت النتيجه وفاة مؤكده لاربع اطفال في قسم الاطفال المبتسرين
زي ما انتو شايفين النكسات جايه ورا بعض بدل النكسه ميت نكسه
ولسه النكسه الكبيره ان ادارة المستشفي مش قالت تاني يوم لاسر الاطفال عن السبب الحقيقي للوفاه
وادعت كذبا ان سبب الوفاه طبيعي وخرج بكده شهادات رسميه
لحد ما يفاجا الجميع بصحيفة المصري اليوم في عددها رقم 1452 وفي صفحتها الرئيسيه
الخبر التالي المصري اليوم تكشف بالصورة وقائع موت ٤ أطفال في مستشفي حكومي بسبب انقطاع الكهرباء
طبعا ادارة المستشفي نفت الامر وحاولة التستر علي الجريمه لكن لولا وجود المحمول الذي اصبح اخر ما بقا للناس لكشف الحقيقه ووجود افلام فيديو لحالة الاطفال
والاطفال في لحظاتهم الاخيره والممرضين يحاولون بكل الوسائل افاقتهم ومعالجة الامر
لكن ارادة الله ارادة كشف الخلل في هذا المكان
عفوا النكسه لم تنتهي بعد
فا في الفيلم الذي يمكنكم تحميله من هنا او مشاهدته




عفوا الفيديو للمشاهدين اصحاب القلوب القويه لانه يحوي مشاهد صعبه جدا

نكتشف علي لسان الاستاف في وحدة الاطفال المبتسرين انها ليست المره الاولي
التي يحدث فيها هذا الخلل لكن عين الاهمال لا تدمع
لكن ما اعجبني بحق في تغطية برنامج العاشره مساء للحاذث والحدث المؤلم ولقائها بعدد من الاطباء ومدير المستشفي ومع نفيهم للحدث ياتي اتصال من احدي الطبيبات بالمستشفي لتقول لهم جميعا اتقوا الله فانتم كاذبون وتعرفون الحقيقه وتخدعون المشاهدين
واكدت ان الاداره تحاول التستر علي الجريمه وتاكد وفاة مرضي في قسم العنايه المركزه
ومرضي علي جهاز التنفسي الصناعي اي ان الضحايا ليسوا فقط من الاطفال
وعندما سئلتها مقدمة البرنامج مني الشاذلي عن عدم خوفها من معرفة صوتها ومحاسبتها عن ما قالت وعن كشفها للحقيقه اجابت انها لا تخشي انسان وانما تخشي الله وده يؤكد ان في ناس بتاخد الخطوه الايجابيه وبتكشف الحقيقه
كان نفسي اتكلم عن النكسه
بس بصراحه مش عارف اتكلم عن اي نكسه فيهم
احنا حياتنا بقت نكسه مستمره
كل نكسه وانتم بخير

12 comments:

  1. والله النكسه
    دي بجد مستمره
    احنا لو حسبنا نكسات مصر هنلاقيها في كل شيء
    حتي في ابسط حق في حقوق الانسان رغيف العيش

    شكرا علي المنوضوع الجميل

    شخابيت محجوب

    ReplyDelete
  2. لا استطيع أن أقول غير حسبى الله ونعم الوكيل فى كل انسان يساعد على الفساد وادعو الله أن يرحمنا جميعا ويصلح أحوالنا لأننا لو لم نستحق ذلك لرفع الله عنا البلاء لذلك لابد أن نعود الى الله فهو معيننا على هذا الفساد وهذا البلاء

    ReplyDelete
  3. يا عم انت غاوى قطع ارزاق
    خليك ف حالك
    خلي الناس تاكل عيش
    واية يعنى اربع اطفال ماتوا
    ما كل يوم اربعين طفل بيموتوا ف فلسطين
    مفيش حد اتكلم يعنى

    خليك ف حالك

    ReplyDelete
  4. على فكرة يا أحمد لما تامر يخليه فحاله امال مين يدور على الفساد وعلى مشاكل الناس مينفعش تامر ولا أى حد فينا يخليه فحاله لأننا كدا بنكون ساكتين عن الحق والساكت عن الحق شيطان أخرس واحنا مش شياطين احنا المعذبين فى الأرض ومش هينفع نخلينا فحالنا
    هههههههههههه
    حمدلله على سلامتك
    مسمعناش تعليقات بقلنا كتير

    ReplyDelete
  5. عزيزي محجوب
    اهلا بيك في مدونة انسان عاشق حر
    واتمني انك تكون من المتابعين لموضوعتها
    اما بالنسبه للنكسه المعاصره فا انا رغم الظلام ده شايف شعاع امل في طريقنا اتمني اننا نمشي لحد ما نوصل له
    ونحقق بجد انتصار علي مشاكلنا زي ما انتصرنا بعد نكستنا

    ReplyDelete
  6. عزيزتي smilyrose
    احب اشكرك علي تعليقاتك
    واحب ايد وجهة نظرك احنا فعلا بناعني من تهديد خطير في حياتنا بسبب نكستنا المتاتليه والناس بقت السبب والضحيه في نفس
    الوقت

    اشكرك علي تعليقاتك الدائمه
    تحياتي

    ReplyDelete
  7. اخي العزيز رومنسي
    انا سعيد جدا بعودتك من جديد وعودة تعليقاتك الجميله
    انا عايز اقول لسمايلي روز
    ان احمد مش يقصد الاستسلام ولا السلبيه
    بالعكس ده بيسخر من الوضع الراهن
    وبينبهنا للناس الاي بقوا ارخص شيء في عالمنا العربي

    تحياتي ليك يا احمد

    ولانك شاعر هرد علي تعليقك برباعيه لصلاح جاهين بتقول

    انا كل يوم اسمع
    عن فلان عزبوه
    اسرح في فلسطين والعراق واتوه
    معجبش من الاي يطيق بجسمه العزاب
    واعجب من الاي يطيق يعزبوا اخوه
    عجبي

    ReplyDelete
  8. الى سمايلى روز
    انت تعرفى ان الشعب المصرى لية واقف على رجلة لغاية دلوقتى ومن 7000 سنة
    عشان بكل بساطة كان بياخد الامور دايما بسخرية علشان يقدر يحلها
    دايما الانسان وهو عصبى مبعرفش يفكر كويس
    شكرا على التعليق

    ReplyDelete
  9. يا سلام عليك يا تامر انت بجد اللى فاهمنى واحشنى فعلا موضوعاتك الجميلة
    وخد بالك الموقع عايز يتنكس
    ههههههههههههههههه
    سلامى يا باشا

    ReplyDelete
  10. على فكرة يا أحمد أنا عارفة إنك بتسخر من الموقف وعارفة إن الشعب المصرى
    صامد لأنه شعب جميييييييل جدا وربنا حباه بروح ملهاش حل ودايما بياخد
    الأمور بسخريه عشان يقدر يواصل المشوار وربنا يخليلك تامر المعجب دائما
    وعلى فكرة وحشنا شعرك

    وبلاش تنكس الموقع عشان بيجمعنا سوا
    هههههههههههههههههههه
    سلام

    ReplyDelete
  11. هههههههههههههههه

    اخويا وحبيبي احمد
    الشهير برومنسي

    اشكرك علي تعليقك بس انا مفهمتش برضه الموقع عايز يتكنس ولا يتنكس

    ههههههههههههههههه

    ReplyDelete
  12. ياريت بلاش تفهم هو كان قصده ايه عشان الأثنين مشكلة اذا كان يتكنس ولا يتنكس فبلاش احسن وبعدين يا أحمد تنكسه ولا تكنسه ولا ولا اقلك بلاش
    ههههههههههه
    وحشنا شعرك يا شاعر

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد