Sunday, July 27, 2008

تامر الحسيني رئيسا للجمهوريه

كنت في الطفوله بحب اسمع خطب الرئيس مبارك وكنت مهتم قوي بالسياسه
وبحب اتابع جولات الرئيس وافتتاحاته وحفلات تخرج الكليات العسكريه
مش عارف ليه حلمت وقتها اني ابقا رئيس جمهوريه وقعدت احط سنريوهات لو دخلت الكليه الجويه وبقيت طيار
زي الرئيس مبارك بعد كده هترقي وابقا رئيس :) طبعا خيالات طفوليه
بس مع الايام لما كبرت وجت حرب الخليج فكرت ان الرئاسه في مصر مش حاجه كبيره
وبعدين هتعب نفسي ليه ما هو الرئيس مبارك هيفضل الرئيس يبقا ادور علي سكه تانيه
قمت حلمت اني ابقا رئيس الولايات المتحده الامريكيه متستغربوش
امريكا اصلها بلد الفرص والسناريو كان اني اهاجر لامريكا واخد الجنسيه وبعد كده اترشح للكونجرس وابقا سينتور
وبعد كده هلاقي نفسي مرشح للرائسه بقدرة قادر وافوز طبعا واعيش في البيت الابيض
بس فكرت لما امسك الرئاسه اغير لونه اخليه ابض في فوشيا مش بقولكم احلام طفوله
بس مع الايام راحة الاحلام وفضل الواقع لحد ما جه موضوع الغلطه المطبعيه الاي اسمها ايمان
صحت الحلم القديم تاني ولاقيت نفسي قدام سؤال مهم لو بقيت رئيس جمهوريه هعمل ايه
طبعا سؤال صعب قوي اصل انا مش هعمل المستحيل الاي محدش عرف يعمله
بس لما فكرت شويه شويه كتير
فكرت في اول خطاب هيوجه للشعب المصري بعد تولي الحكم

بسم الله الرحمن الرحيم
والصلاة والسلام علي اشرف المؤمنين سيدنا محمد عليه افضل الصلاة والتسليم

الشعب المصري العظيم انه من دواعي سروري وعظيم فخري ان اكون قائدا لهذا الشعب العظيم
هذا الشعب الذي عاني علي مر تاريخه الطويل ويستحق الان ان ياخذ حقه
واسمحوا لي ان اتحدث اليكم بالبلدي
علشان ابسط واحد في البلد دي يفهمني لانه اهم شخص عندي
انا طول عمري منكم ومش بفكر غير فيكم واقدر اقدر مشاكلكم واعرف احتياجتكم
بس انا مش بوعدكم بالجنه لا انا مش هقدر اعمل كتير
مش هوعدكم اني هنزل الاسعار ولا هزود الدعم علي رغيف العيش
ولا هوعدكم اني هخلي مصر ترجع زي زمان اجمل بلاد الدنيا
لاني مش هقدر اعمل كل ده
بس انا بوعدكم اني هخليكم تقدروا انتم تعملو ده
مش همنع حد يقول رايه واهم شيء عندي
وسبب وجودي هنا في المنصب ده هيكون موجه لشيء واحد
انا عارف انه اهم من الاكل والمواصلات والبطاله
انا اوعدكم اني هحافظ علي دم المصريين وارواحهم
واني مش هرحم اي حد يعتدي علي دم مصري وهخلي المصري يرجع بجد
اغلي انسان وكرامة اصغر مواطن في مصر هتبقا زي كرامتي
وبوعدكم مش هسمح لحد يستبيح دمائكم في البحر ولا ياثر مصريين او يحاكمهم في بلاد اجنبيه
بشكل ظالم ولا هتساهل مع اي حد يستبيح دماء المصريين
وخلينا نبتدي سوا بالنقطه دي ونكمل سوا طريقنا للحريه والليبراليه
وشعار مصر حره لازم يكون مصر بلد حره لشعب حر
والله الموفق الي ما فيه الخير

تامر الحسيني
رئيس جمهورية مصر العربيه

ههههههههههههههههه
اتمني البيان بتاعي وخطابي للشعب يكون عجبكم
لو عجبكم ممكن تصوصتو لي في الانتخابات الرائسيه الجايه
بس الاي يشوف اني مش اضفت في خطابي يبص لحال مصر اليوم
هيلاقي محكمة سفاجا بتحكم بالبرائة علي اشخاص ساهموا في قتل 1035 مصري
تخيلو كل دول قتلي العباره المنكوبه ويتحكم ليهم بالبرائة لو شفتوا رد فعل اهل الضحايا علي الحكم
مش ممكن تصدقوا الاي بيحصل في مصر وقد ايه دم المصريين رخيص
علي المصريين وده يخلي كل يوم قتلي علي الحدود من الشرطه والجيش وحتي اسرائيل لا تقدم اعتزار علني
اسرائيل الاي قامت بحرب كامله لاجل جنديين من جنودها ومكنتش تعرف عايشين ولا ميتين كمان
وتخيلو ان بعد كل السنين دي لسه في مصريين في المعتقلات الاسرائيليه لحد اليوم
املهم الوحيد ان حزب الله يعمل صفقه ويطلعهم
وطبعا مصر نايمه في العسل كرامة المواطن من كرامة البلد

12 comments:

  1. هننينا ومتعنا يا ريس
    انت رئيس والنعمة كويس
    انت رئيس ولا حدش غيرك
    جايب حقنا لله يعينك
    ومن غيرك احنا نتيس

    ReplyDelete
  2. يا تامر باشا افكارك دايما جميلة ودا حلم نص شباب مصر

    انا افتكرت شعر للشاعر احمد فؤاد نجم
    بيقول


    عشان انت مصرى لازم تعانى
    وتفقد كرامتك بكل المعانى
    وتحرق فى دمك سنين مش ثوانى
    واوعى تصدق كلام الاغانى
    بتاع الحضاره وكانى ومانى
    ده كله هجايص مايدخل ودانى


    عشان انت مصرى العذاب بيناديك
    بتبدا فى يومك حاجات بترازيك
    فى نومك فى قومك تعكنن عليك
    تضايقك ولسه العماص فى عينيك
    مافيش ميه تشطف صابونه فى ايديك
    وجسمك ملزق وريحتك عاديك
    فتلبس وتنزل وفيك اللى فيك


    ورايح لشغلك حتحتاج مواصله
    ادى المترو واقف وكهربته فاصله
    وفى الميكروباص خناقه وحاصله
    اوتوبيس فرامله عايزالها وصله
    وتوك توك ده تايه ومحتاج لبوصله

    بتوصل لشغلك بدم اتحرق
    فى زحمه وكتمه وحر وعرق
    رئيسك سايبلك كومه ورق
    ده غير دمغه ضايعه وملف اتسرق
    وفى كام مواطن عامللك قلق
    بيشكى تقول له روح اندعق
    وعركه وهوجه وشاى اندلق
    ومخك خلاص من الصداع اتفلق

    هترجع لبيتك ده لو كان فى بيت
    هتوصل هتندم ياريتك ماجيت
    مراتك بتصرخ خلاص استويت
    عيالك بتطلب وهات كيت وكيت
    تزعق تهاتى ياناس اتهريت
    ولاحد سامعك مهما هاتيت


    عشان انت مصرى وده للاسف
    فلازم تاسى تعيش تتقرف
    وكل الاساسى فى حياتك ترف
    فتنسى الكرامه وتنسى الشرف
    وتسرق وتنصب او تنحرف
    ودمعك بيجرى وجرحك نزف
    مش انت اللى مصرى؟؟؟ جتك القرف

    ReplyDelete
  3. ههههههههههه حلو اوى تفكير الاطفال عجبنى اوى الابيض فى الفوشيا

    بس فعلا رئيس جامد على الاقل موعدتش الشعب بحاجات مش هتقدر تحققها كفاية انك كنت صريح معاهم من الاول

    واحلى حاجة انك كلمتهم بلغتهم ياسلام على التواضع

    وميرسى انك جاوبت على سؤالى

    وان شاء الله تبقى رئيس وتحقق حلمك

    تحياتى

    ايمان

    ReplyDelete
  4. جميل جدا أن يحلم كلامنا فى صغرة بشئ ويتمنى تحقيقه
    وسيكون أجمل إذا تحقق هذا الأمل ولا تتعجب إن وجدناك
    فى يوم من الأيام رئيسا لتلك الدولة لعلك تستطيع أن تفعل شئ
    لم يفعله الكثيرين على الأقل قد تحاول تحفيز كل فرد على عمل شئ
    يحبه ويتمناه ومتنساش إن كل شئ فى الكون بدأ بحلم
    وبعد كدا مجهود وإصرار للوصول وياريت ربنا يحقق لك
    كل ما تتمناه ولا تنسى أن الله يعين المرء على ما يريده إن
    كان صادق النيه ويريد الخير وربنا يستر ياريس
    ومتتغيرش بعد كدا
    ههههههههههههههههههههههه
    على فكرة ياتامر هتبقى بجد ريس مرح مش هتتكلم بالبلدى
    ومش هتوعدهم بحاجات زى ناس وبعدين تخلى بيهم
    وكفاية انك صريح معاهم وصادق ودا شئ صعب تلاقيه فى زماننا هذا
    ملحوظة
    بقول لأحمد حمدلله على السلامة
    وحشنا تعليقاته
    وكلامه الجميل وياريت ما يغبش عنا كتير
    Smilyrose
    وردشان سابقا

    ReplyDelete
  5. شكرا ليكى يا smilyrose
    انتى اللى دايما تعليقاتك احلى بكتير
    ودايما متجددة

    شكرا ليكى

    ReplyDelete
  6. صديقى تامر

    رغم ان التدوينة نموذج جميل للأدب الساخر

    الا انها تطرح سؤال جاد

    تفتكر لو اى حد مننا

    احنا المظلومين حصل له ده

    تفتكر هيكون عادل فى حكمة ؟؟

    ولا الكرسى بيغير النفوووس

    :)

    تحياتى
    احمد الصباغ

    ReplyDelete
  7. اخي العزيز رومنسي
    اولا اهلا بيك بعد الغيبه الطويله
    واحشني جدا ووحشني تعليقاتك الساخره

    وبشكرك علي تشجيعك ليه في طريقي للحكم
    ومتخفش لما امسك ان شاء الله مش هناسك
    بوزارة من الوزرات
    بس يارب القي حاجه علي قدك

    هههههههههههههههه

    ReplyDelete
  8. عزيزتي ايمان

    طبعا انا بشكرك لانك انتي الاي دفعتيني اني ارجع تاني لحلمي لان اكون رئيس جمهوريه يعني الموضوع علي مسؤليتك
    ولو في اي مؤامره لقلب نظام الحكم هتبقي انتي اول المشاركين

    هههههههههههههههههه

    تحياتي ليكي
    تامر الحسيني

    ReplyDelete
  9. عزيزتي سمايلي روز
    انا طبعا متشكر قوي علي ثقتكم الغاليه فيه
    كرئيس للجمهوريه
    ومرسي قوي اني هبقا رئيس مرح
    بس ربنا يستر ومش احكم بالحديد والنار
    هههههههههههههههه

    تحياتي

    ReplyDelete
  10. عزيزي احمد الصباع

    اولا اشكرك علي زياراتك المتكرره للمدونه وارائك في الموضوعات

    ثانيا انت طرحت وجهة نظر هامه جدا برضه لمحت ليها smilyrose
    وهي ان الانسان العادي لما هيبقا في مكان زي ده
    اكيد برضه الكرسي هيغيره
    ده سؤال صعب وصعوبته نابعه من ان كل امنسان هيقدر يجاوب عليه بشكل مختلف
    لان كل انسان ليه شخصيه مختلفه عن الاخر
    اما امنا بقا لو بقيت رئيس جمهوريه
    فاوعدكم اني هحاول جاهدا اني مش اخلي مكان زي ده يخلني انسا الناس الاي انا منهم
    ولونها مش مضمونه الحكايه دي
    هههههههههههه

    تحياتي
    انسان عاشق حر
    تامر الحسيني سابقا

    ReplyDelete
  11. This comment has been removed by a blog administrator.

    ReplyDelete
  12. مدونة جميلة

    تقبل مرورى

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد