Friday, May 30, 2008

المترو وأنا

زمان كان في فيلم اسمه اتنين تحت الارض
وكنا نسمع في الافلام العربي عن العالم السفلي والناس الاي عايشين تحت الارض
كل ده طبعا كان زمان لان معظم سكان القاهره دلوقتي بقوا عايشين تحت الارض
حتي اعلانات القنوات الفضائيه بقوا يقولو فيها هما عايشين تحت الارض واحنا فوق نكح تراب
ههههههههه
ما علينا
انا بصراحه من اهم رواد عالم تحت الارض ده عالم مترو الانفاق
تخيلو بقا كل شويه واخد الطريق من حلوان للمرج ومن شبرا للجيزه رايح جاي جاي رايح
حد قالي انه مش بيحب يركب المترو علشان لما بيركب المواصلات
بيقعد جنب الشباك ويتفرج علي الناس والشوارع بس متهيئلي الواحد ده انتحر من سنين طويله بعد ما خلاص ياس بسبب وشوش الناس الاي خلاص فقدت الامل في الحياه بسبب ارتفاع الاسعار والغلاء وطبعا الشوارع مش بقا فيها حاجه تتشاف غير اطفال الشوارع والزباله والشحاتين واللون الرمادي الاي بقا اللون المميز للقاهره
بسبب الدخان و الزحام واحد تاني بقا اعرفه من ايام الجامعه من كازخستان كان بيتعلم لغه عربيه في كلية الالسن جامعة عين شمس وقالي مصر بلدكم هتبقا حلوه لو بقا عندكم جليد زي عندنا
هتلاقي مصر في الشتاء بيضاء من الثلج وفي الصيف هتلاقي المباني كلها نضيفه بعد الثلج ميدوب
مش عارف ليه من وقتها بتخليل الشعب المصري هيمشي اذاي في وسط الجليد ده
واتخيل واحد قاعد علي الرصيف مادد ايده وبيقول لله يا محسنين يلاقي ربنا فرجها عليه بحتة ثلج حلوه وبرضه الثلج الابيض ينفع في اليوم الاسود
المهم اني مستني بفارغ الصبر الخط الثالث لمترو الانفاق علشان اروح العباسيه بالمترو
وارتاح من التراب الاي فوق الارض بس للاسف المترو كمان اتغير مش هوا المترو الاي عرفناه زمان
يعني في المترو دلوقتي بقا فيه باعه جائلين وكمان متسولين
وتبص علي العربيات من جوه تلاقي مكتوب اعلانات مندوبين المبيعات
واعلانات انقاص الوزن وتكبير ايه وتصغير ايه وزرع الشعر ونقله من المناطق الماهوله للمناطق غير الماهوله شعرايه شعرايه
وحجات غريبه قوي بتفكرني باتوبيس النقل العام ربنا يتوب علينا منه يارب
طبعا سبب انتظام الناس في المترو زمان انهم كانو عارفين ان في نظام
وان فيه كاميرات مراقبه وناس تخاف تدخن علشان الغرامه
وللاسف هو ده النظام الناجح في مصر عايز مصر تمشي زي الساعه
الاي يخالف اشارة المرور اقطع رجله والاي يشيل سجاره في مكان عام اقطع ايده
طبعا الشعب كله هيمشي مقطوع الايدي والارجل ده اول خاطر هيخطر في بالكم بعد كلامي
بس لا ده مش صح للاسف لو واحد بس اتقطع رجله هتلاقي مصر بقت زي الساعه
والناس ماشيه خايفه تغلط في الشارع او المواصلات او في اي شيء
لانها عارفه ان فوق دماغهم كده حد بيبص عليهم ويراقب
ولو مش مصدقني جربوا ولو مره واحده واحد كده يكون فدائي وقتها ويجرب يخالف القوانين
والداليل الحزام بتاع العربيه الناس بعد ما شافت الغرامات في التلفزيون بقت تمشي بالعربايت منغير عجل بس تمشي بالحزام علشان متاخدش مخالفه
للاسف انا مش شايف اي حل غير تغيير القوانين علشان يبقا في حل لازمة الانسان المصري المعاصر الاي خلاص اتعود علي العين الحمرا واحب اشكر كل من يستخدم العين الحمرا مع الشعب المصري لانه ذكي وقدر يفهم الشعب كويس وعلي راي عمرو اديب
هتلاقو مصر بقت فله شمعه منوره

Monday, May 26, 2008

بأمر الحب

بأمر الحب
اسمع يا حياة قلبي
ندا قلبي جاوبني بصلي قرب
كمان قرب هنا جنبي
وهات شوقك علي شوقي وهات حبك علي حبي
وانا وعيونك الحلوه نعيش قصة غرام حلوه
حرام نسكت علي قلوبنا
حرام الشوق يدوبنا
بلاش نهرب
بلاش نتعب
تعالي نحب ونسلم
بأمر الحب




الكلمات دي
هي اول كلمات رومنسيه يتفتح عليها
احساسي بالحب
وده من سنين طويله من الطفوله
وكانت مع اول احساس بالحب في قلبي
واول مره احس فيها بالشوق لحد
واحس فيها اني مفتقده
بس في فيلم حليم
استخدم المخرج الكلمات دي في لحظه فارقه في حياة عبد الحليم
وهي لحظة وفاة جيهان حبيبته
الاي اكسبت الكلمات رومنسيه وحزن عجيب
وطبعا كلامي مش هيوصف الحاله الفنيه دي
علشان كده بتمنا تشوفو المشهد ده من الفيلم
وتقولو رايكم فيه



الرجاله عايزه ايه؟

الرجاله عايزه ايه؟
هو سؤال مش عويص ولا حاجه لان الرجاله عندهم شوية ثوابت تقليديه كده مش بيختلفوا عليها كتير

لكن قامت البنت دي الاي هي خيخه واي كلام خالص
بعمل مجموعة اسئله وقدرت توصل منها لنتائج عن بجد الرجاله عايزه ايه
ولانها اسئله بجد مهمه انا قررت اني انشرها وانشر اجاباتي الشخصيه عليها
وكمان احب اشكرها علي اسلوبها وكنت اتمني اروح حفل توقيع كتاب مدونات مصريه للجيب علشان اشوفها واتعرف عليها لكن المناسبات جايه كتير ان شاء الله

الرجاله

عايزين ايه من الاب

انا عايز والدي يستمر في اعماله الخيريه
لانها بجد شيء عظيم وانا سعيد بيه من جوايا رغم اني مش بقول كده له

عايزين ايه من الام

عايز ابوسها

عايزين ايه من الاخت

تبطل تغير اماكن حجاتي الخاصه


عايزين ايه من الاخ

عايزه يبقا صديقي زي ما هو اخويا


عايزين ايه من زميل العمل

يبطل مقالب ويتعاون معايا لصالح العمل وصالحنا المشترك

عايزين ايه من زميلة العمل

ههههههههههههه
تبقا حلوه وطيبه ومحترمه وتتعامل معايا في حدود الشغل

عايزين ايه من الصديق

انه يحفظ اسراري ونفضل سوا في المستقبل

عايزين ايه من حمواتكم الفاتنات

عايز بس مقدما كده اتعرف عليها
وعايز بعد ما اعرفها تحبني زي ما هحبها اكيد

عايزين ايه من الزوجة

تكون طيبه وذكيه وجميله وتسمح لي اني اسعدها
واشاركها كل ايامها الجايه

عايزين ايه من الجواز

عايز الاستقرار والهدوء والاطفال والبيت الجميل المريح

عايزين ايه من الشغل

عايزه يساعدني اني احقق احلامي منه ويساعدني اني ابقا في يوم في مكاني القيادي
الاي تئهلني ليه امكانياتي

عايزين ايه من الدنيا

عايز من الدنيا لحظه جميله مع انسانه جميله ابقا حبيبها
وطفله جميله ابقا والدها

عايزين ايه من عيالكم

عايزهم يقدروا حبي ليهم ويبقوا دائما قد المسؤليه الاي هحملهالهم من الطفوله


امتى تلجأوا انكم تخونوا مراتتكم

الخيانه شيء صعب جدا وانا لا اقلبه ليه ولا اقبله للانسانه الاي هتشاركني حياتي

امتى ترموا يمين الطلاق على مراتتكم

في حالة الخيانه
وحالة استحالة استمرار الحياه بينا
ورغبتها الشخصيه

امتى تعوزوا انكم تتجوزوا تانى

لما مش ابقا متجوز اولاني هبقا محتاج اتجوز تاني
يعني متجوز بانسانه مش زوجه حقيقيه تقدر حبي وتشاركني حياتي
وتقدر تخليني سعيد معاها

امتى تلجأوا انكم تمدوا ايديكم دى
اللى عاملة زى المرزبة على مراتتكم

يعني ايه مرزبه؟
هههههههههههههه
انا زوجتي لا اقبل انها تتعرض لموقف زي ده

هل عندكم استعداد انكم تتجوزوا واحدة غلطتوا معاها؟

ايوه ولو ان ده افتراض صعب ومش هيحصل
لكن انا موافق اتجوز انسانه حبيتها وعرفتها وقربت منها اكتر من اني اتجوز اي حد مش اعرفه
وحد تاني قرب منه

ايه المواصفات اللى عايزنها فى عروسة المستقبل
بيضا سمرا قمحية
مش مهم اللون المهم اني احبها الاول وبعد كده اي شكل هتكون عليه اكيد هحبه

بس افضل تكون قمحيه او بيضاء

غير محجبه / محجبة /لابسة خمار/منقبه
يفضل انها تكون محجبه
لكن لو مش محجبه مش هعترض لاكن هنصحها بالحجاب
اما بالنسبه للخمار او النقاب فده شيء خاص بيها
ولن اتدخل فيه ولو اني مش اقبله

الشعر طويل /قصير /اسود /اصفر

مش مهم المواصفات الشكليه لكن افضل يكون الشعر اسود طويل طول متوسط

عادى ان مراتك تحط مكياج برة البيت ولا هتقولها لأ
بتحب ان مراتك تحط مكياج جوة البيت ولا لأ

عادي انها تحط مكياج بره البيت او جوه البيت
بس يجب تراعي انه يكون محطوط بشكل جميل ومش بيخلي الشكل مش مقبول
اوميكونش زياده عن اللزوم

لو مراتك ماكنتش محجبة وبعد الجواز هى اتحجبت لوحدها
من غير انت ماتأمرها او تفرضه عليها

وجت هى بعد فترة عايزة تقلع الحجاب

موقفك هيكون ايه؟
هتضايق طبعا

وهقول ليها انها قدام التزمت قدام ربنا بشيء عن قناعتها الشخصيه
غلط انها تلغي التزامها ده

لو مراتك عايزة تتنقب وانت مش عايزها تتنقب ؟هتعمل ايه؟
مش هاتتدخل بإعتبار ان دى علاقتها بربنا
ولا هترفض

النقاب مغالاه في الدين ومفيش نص ديني بيشير اليه
ولذلك هرفض ده وهطلب منها تفكر بهدوء لحد ما تقتنع بارادتها

تقبل انك تتجوز واحدة منقبة متعرفش عنها اى حاجة
لا طبعا

تقبل تتجوز واحدة مدخنة او بتشرب شيشة
لو انا مدخن او بشرب شيشه
هقبل بس انا مش مدخن

تقبل تتجوز واحدة كانت مخطوبة
ايوه طبعا

تقبل تتجوز ارملة اخوك او طليقة اخوك
او ارملة صاحبك او طليقة صاحبك

الزواج من مطلقه او ارمله شيء مش حرام وانا اقبله
بشرط ان يكون في حب بينا

امتى تعوز ان يكون ليك صديقة
لما زوجتي متقدرش تقوم بالدور ده بس انا اقصد بالصديقه
اخت ليه زي اي صديق ولد

ايه مفهوم الخيانة بالنسبالك
يعنى هل لو مراتك عرفت انك ليك صديقة
هتعتبر ان مالهاش حق انها تزعل على اساس انك معملتش
سيكو سيكو
ولا هتحس برضه انك غلطان وانك جرحت كرامة مراتك

الخيانه يعني اني حتي افكر في خيالي في اي انسانه
كبديل لزوجتي
لان محدش ينفع يبقا بديل ليها


لو انت شايف ان عادى يكون ليك صديقة
هل شايف ان عادى ان مراتك يكون ليها صديق

ايوه بس بشرط مهم جدا
ان صديقها ده يكون معروف ليه بصفه شخصيه وصديق مشترك بينا
وكذلك بالنسبه لاي صديقه ليه
يعني مفيش صديق شخصي
في اصدقاء الاسره لاننا خلاص بقينا كيان واحد مينفعش يكون لكل واحد منا اصدقائه الشخصيين
انما عادي انه يكون في اصدقاء لينا سوا

هل لو كنت مسلم ممكن تتجوز واحدة غير مسلمة
ولو اجابتك اه
ياترى هتفرض عليها انها تدخل فى الاسلام ولا هتسيبها براحتها

ايوه لكن لن افرض عليها الاسلام


ولو كنت مسيحى يا ترى عندك استعداد
انك تسلم علشان تتجوز حبيبتك المسلمة

مستحيل اتخلي عن ديني علشان اي شيء تاني

لو خطيبتك مش بتصلى
هتكمل الجوازة عادى ولا ايه نظامك

هنصحها طبعا بالصلاه
وهشجعها علي كده

لو خطيبتك مش بتعرف تطبخ
هتكمل الجوازة عادى ولا هتفلسع

يكون افضل علشان بعد كده تتعلم
بس الاكل الاي بحبه

بتحب الست الرفيعة ولا التخينة
الاول القا الست الاي تستاهل الحب
وبعد كده احبها رفيعه او طخينه زي ما هي
بس افضل تكون وسط تميل انها تكون طخينه

عادى ان مراتك تروح عند دكتور امراض نسا
ولا لازم تروح عند دكتورة

عادي بس لو في دكتوره متميزه في المجال ده يكون افضل

عايز مراتك تسمع الكلام وخلاص
لا عايزها تتناقش معايا في اي شيء معترضه عليه
او مش مقتنعه بيه
ولو كانت مش مقتنعة بأرائك
هنحاول نوصل سوا لوضع مناسب لينا سوا

او حل وسط

هترفض ان مراتك تكمل تعليمها العالى
او تاخد كورسات فى سبيل انها تطور من شخصيتها
ولا هتشجعها على كدة

بالعكس انا هشجعها جدا وبقوه
لاني بيهمني قوي ان شريكتي تكون متميزه في مهارتها وليها شخصيه
وعندها مستوي علمي كويس وهعتبر دائما ان رسالتي اني اخليها افضل وفي طريق النجاح

عايز مراتك تشتغل ولا لأ
ياريت اى كانت اجابتك ياريت تذكر الاسباب

افضل انها تاخد القرار ده لوحدها
لان الشغل ده شيء يخصها هي
طول ما هي بتؤدي دورها في البيت بشكل كويس ومهتمه بالاولاد
وطبعا لو بتشتغل انا هقدر مجهودها واحاول اني اساعدها في البيت

ممكن تتجوز واحدة اعلى منك ماديا واجتماعيا
اه ولا لأ

افضل تكون اقل مني ماديا بس مش اجتماعيا
لكن اي كان الامر مش هياثر في اي شيء في علاقتنا
وقدام علاقتنا هيبقا ده شيء ثانوي لا يلتفت اليه

عايز مراتك فى وقت السيكو سيكو
تكون ابيحة ولا مؤدبة

انا مش ببص للعلاقه بيني وبين زوجتي
بشكل يخضع للتصنيف ده
لانه تصنيف ظالم جدا
وانا برفضه
لكن انا عايز زوجتي تبقا شريك ليه وتفهمني وافهمهما


لو متجوز ومراتك مختنة هل ده بيأثر فعلا فى علاقتك الحميمية بيها
وكنت تتمنى انك تتجوز واحدة غير مختنة
لو عندك بنات هتعملوهم عملية الختان ولا لأ

بصراحه لسه مش جربت علشان اعرف
انا لسه مش بحثت في الامر بشكل ديني
وصحي لكن اي كان وضع زوجتي انا هقبله

عندك استعداد انك تدى لمراتك مصروف خاص بيها
ولا شايف انه مش من حقها

ايوه طبعا ده ابسط حقوقها

هل لو حصل طلاق هتجبر مراتك انها تتنازل
عن مؤخرها ونفقتها ولا هيكون عندك دم وهتديها حقوقها

ههههههههههههه
هيكون عندي دم بس ربنا ميجبش طلاق

لو كنت مش متجوز عايز تتجوز عن حب ولا عايز جواز تقليدى
الحياه بلا حب ليست حياه
فما بالك بالجواز بلا حب لكن مفيش مانع
انه يبقا جواز تقليدي قائم علي الحب

ممكن تتجوز مطلقة او ارملة حتى ولو كنت لم يسبق لك الزواج
ايوه

ممكن تتجوز واحدة اكبر منك
لو اجابتك ايوة
اكبر منك بأد اي ايه
مش مهم عمر محدد المهم تكون بتحبني وبحبها
وتكون انسانه جميله وطيبه

موضوع طويل قوي صح ودسم جدا انا بصراحه تعبت قوي لاني بحاول اني احط نفسي في الموقف فعلا واجاوب عليه بس اتمني يكون عجبكم وطبعا باب التعليق مفتوح
وياريت اعرف ارئكم انتم كمان

Saturday, May 24, 2008

حسيت بحاجه؟

حسيت بحاجه؟
ده السؤال الرئيسي الاي طرح في اوساط الشارع المصري وفي المدونات وعلي الفيس بوك
وفي كل مكان كل واحد بيسئل حسيت بحاجه ده طبعا يوم 5 مايو بعد خيبة 4 مايو التقيله
لكن سبحان الله كل الاي كان بيسئل بقا بقدرة قادر منغير ميتسئل بيجاوب
الشعب كله حس باجدع واقيم واحلي اقفا في تاريخه المعاصر
ولان الشعب خلاص بقا مدمن ضرب علي القفا مباقش يفرق معاه
ولانه شعب طيب وغلبان وابن نكته انتشرت كالنار في الهشيم نكته جميله وعجيبه قوي
بتقول "مره حاكم مصر حب يختبر حب الشعب ليه قرر ان كل مواطن وهو معدي الصبح علي كبري قصر النيل يدفع رسم مرور جنيه بس توقع ان الشعب هيرفض ولان الشعب بيحبه الشعب دفع بهدوء عجيب خلي الحاكم يشك فقرر انه يفرض عليهم رسم مرور قلم علي القفا وهنا بدائت تنتشر الهمهمات بين الشعب فقرر الحاكم ينزل بنفسه يشوف الشعب بيقول ايه لاقي الناس معترضه ومتضايقه قوي وبتقول طالما مش هنعدى غير لما ننضرب على قفانا ليه مبيوفروش ناس كفايه تضرب علشان نخلص"حلوه صح طبعا بتقولو الحمد لله مش بنعدي في طريقنا علي كوبري قصر النيل ودي بقا الخيبه التقيله
وعلشان النكته دي انا قررت ان مفيش داعي اتكلم عن القفا ده واوفر كلامي لاقفا تاني من الاي نازلين يرفوا علي الشعب الغلبان لكن صراحه ان القفا الاولاني الشعب اخده يوم 4 مايو الساعه 10 مساء
ولذلك حكمه مفادها ان الاضراب خلص والشعب يضرب بقا دماغه في الحيطه
مين بقا صاحب اليد الكريمه الاي اعلن عن خطة الحكومه لتوفير نسبة ال30% السحريه
هو رجل مصر الجديد احمد عز الرجل ده بجد يا جماعه ايده يامه ادت الشعب بالقفا لدرجة اني بحسده علي قوة ايده بسميه الرجل صاحب اليد الحديديه بجد بما انه بتاع حديد
واحمد عز كما يعرفه ويكيبيديا، الموسوعة الحرة هو رجل أعمال مصري رئيس مجموعات شركات العز الصناعية والتي تضم شركة العز الدخيلة للصلب وهو أيضا أمين التنظيم وعضو لجنة السياسات في الحزب الوطني الديمقراطي الحزب الحاكم في مصر وقام بتمويل حملة الرئيس حسني مبارك الانتخابية كما يرأس أيضا جمعية جيل المستقبل المقربة من جمال مبارك نجل الرئيس المصري يظن انه واجهة فقط
لثروة آل مبارك وتنتج مجموعة شركات الصلب التي يرأسها نحو ثلاثة أرباع إنتاج مصر من الصلب
وطبعا الكلام واضح قوي ويفسر بشكل جميل سر ارتفاع الحديد من 2000 جنيه الي 8000 جنيه للطن في عام واحد
والاجمل كمان هو تفسير احمد عز نفسه عن ارتفاع اسعار الحديد في مجلس الشعب حيث قال في استجواب له ان سعر طن العدس 10000 جنيه وده العدس الاي الناس بتاكله وبترمي الباقي مش عايزين سعر طن الحديد يبقا بدل 10000 يبقا 12000 جنيه
متستغربوش من البجاحه بتاعته في مجلس الشعب فالسيد احمد عز هو المسؤل الذي منع الصحفيين من التصوير في مجلس الشعب نهائيا
بعد ما تم تصويره قاعد ياكل لب وسوداني في مجلس الشعب الاي بتدار فيه بلدنا المباركه
بس مش هنخفي ان احمد عز هو السبب في الواجهه الاعلاميه الجديده للحزب الوطني
وعلي طريقة اغنيات روبي بيقوم المخرج شريف صبري بعد ما نزل روبي من علي العجله بيطلع دلوقتي العمه فوق دماغ الشعب
وعمال يخرج كليبات مصر بتتقدم بينا الاي بقت شعار الحزب الوطمني الديمقراطي والاي كلها تزييف للحقيقه
وده مش غريب علي شخص زيه بيعرف اذاي يزيف الحقائق مقابل اموال احمد عز
وبكده تبقا الصوره واضحه بالنسبه لينا وسعر الحديد المستورد في السوق الان 4000 جنيه وطبعا محتكر استيراد الحديد
هو برضه محتكر انتاجه يعني برضه احمد عز الاي بيبيع الحديد لاسرائيل باقل من سعر البيع في مصر
بس واضح ان دي بقت سياسة الدوله المصريه انها تدعم دولة الكيان الصهيوني اسرائيل علي حساب الشعب الغلبان
هتتاكدوا من كده لما تعرفوا ان وزارة البترول بتبيع الغاز الطبيعي للمصرين ب16 جنيه حوالي 2 دولار
وسعره العالمي 10 دولار في الوقت الاي بتبيعه لدولة اسرائيل بدولار وربع كسعر ثابت لمدة 30 سنه
تصدقوا الكلام ده طبعا دي اكبر من اي مهزله واكبر من اي قفا ممكن تتصوروه
وده الاي دعا الناس علي الفيس بوك لعمل حملة المليون توقيع لوقف تصدير الغاز لاسرائيل وطبعا
الحكومه ودن من طين وودن من عجين والمصيبه ان بعد كل ده
القا قراء المدونه بيسئلوني مكتبتش ليه عن القفا
بقيت محتار هما يقصدوا اي قفا فيهم احنا شعب عايش علي الضرب في القفا
ويبقا السؤال اللزيز
حسيت بحاجه؟؟؟؟؟؟؟؟؟؟؟


Wednesday, May 14, 2008

انت العمر



حبيبتي

انت البحار جميعها

وانا المطر

انتي الغصون جميعها
وانا الشجر

انت الدموع
وانا العيون حزينة تهوي السهر

فلولا البحر ما كانت شموس
الحب تجعلني سحابا

وتاتي نسمة الاحلام
تسقطني مطر

ولولا الغصن
ماكانت الاشجار تنبت في بطون الارض
وتاتي مواسم حبنا الوردي
فيعلوها الثمر

ولولا دموع العين تاتي في المساء
ما كان شوقي للقمر

انتي القمر

مرآه وجهي في الظلام
وشعاعه
قنديل يهديني طريقي في الصحر


انتي رفيقة غربتي
انتي السفر

انتي النجوم مضيئة
تزين وجه الكون في وقت السحر

أنتي الجداول في الروابي
يستحي ماءك
كل عصفور يغرد علي الوتر

أنتي الفراشة اللعوب
تتراقصين علي الخمائل
بين النسائم والزهر

أنتي السنين جميعها
انتي العمر

Monday, May 12, 2008

طعم النجاح

النجاح كلمه دائما بنفكر اذاي نوصلها
لان فعلا اجمل احساس الانسان ممكن يحسه في حياته
هو طعم النجاح لكنه ليس بالطعم اليسير
طعم النجاح يجب ان يسبقه طعم الجهد الشاق
والاسرار والرغبه الاكيده في النجاح فالنجاح ليس منحه او هبه
النجاح جهد وتعب وتخلي عن الكثير من المخاوف وحاله من حالات الامل
لن يستحقها الا من يبذل اقصي ما لديه ليحصل عليها
والانسان في حياته مخلوق مكرم وقد كرمه الله بنعم كثيره منها نعمة العقل والانسان العاقل
هو من يقدر احتياجاته ويستطيع ان يصنع اهداف لاشباع تلك الاحتياجات
ويبني من الاهداف خطط ويحول الخطط لاجرائات يطبقها ليحصل في النهايه علي النجاح
وفي طريق النجاح يجب ان تصادف الفشل فالنجاح بلا فشل لا قيمة له
والفشل شيء ضروري واساسي في حياتنا
ولن تصدقوا ان الفشل هو الصانع الحقيقي للنجاح
فالنجاح الكبير ثمره من ثمار الفشل الكبير اذا كنا بحق من اصحاب العقول ونستطيع تحديد اسباب الفشل بالتالي سنتجنبه في كل محاوله اخري قادمه
والفشل لا ياتي من الظروف او الضغوط او الواقع بل ياتي الفشل من داخلنا
ولذلك نحن قادرون علي تغييره اذا قمنا بتغيير نظرتنا للامور
وللنجاح طريق وللفشل طريق اختر طريقك واتجاهك وامشي فيه وستصل لمبتغاك في النهايه
عندما سئل اديسون عن عدد مرات فشله في صنع المصباح الكهربائي اجاب 999 مره
وعندما سئل ولماذا حاولت بعد كل هذا الفشل من جديد اجاب
انه عرف 999 طريق للفشل ولم يتبقي غير طريق واحد هو طريقه للنجاح فكيف يتوقف دون ان يسلكه قد نفشل ولكن يجب ان نحاول من جديد قد لا ندرك النجاح مره اخري
لكننا لن نتوقف عن المحاوله لان روح النجاح شيء غريزي لن يظهر بالياس
بل يظهر بالمحاوله ربما تفشل مره واثنين وثلاثه حتي وان فشلت مئة مره
فتاكد ان المحاوله رقم مئه وواحد هي المحاوله الناجحه وان لم تكن ناجحه وكانت المحاوله
مئه وخمسه هي الناجحه وصدقني لما تتعب وتوصل للحل
هتقدر تحس بطعم النجاح وتتزوق طعم النجاح اوعي تحرم نفسك من طعم النجاح
حس بجد بطعم النجاح وكافء نفسك واستمتع بنجاحك لان من حقك تحس بيه
ومن حقك تحدد الخطوه الجايه
وتستمتع بكل نتيجه من نجاحك



Thursday, May 1, 2008

اول مقلت يا كومبيوتر


غريب اوي العنوان ده
اول مقلت يا كومبيوتر تعرفوا ان وقتي كله بقضيه علي النت في شغلي في بيتي وكمان حتي في الشارع من خلال الموبايل وعلشان كده انا هحكيلكم علاقتي بالتكنولوجيا وذكرياتي معاها
طبعا ذكريات جميله قوي وبدات زمان قوي لما كنت في الاعداديه ولسه يدوب بستعد للمرحله الثانويه وفي الوقت ده عمي جاب اول جهاز متطور في بيت العائله وكان جهاز كومبيوتر ومعاه كتاب كمان
وطبعا من اول لحظه في تعاملي مع جهاز زي ده حسيت بالعظمه وكنت بتعامل معاه كئنه سحر او حدث تاريخي طبعا وقتها كان عمي بيشتغل في الشرطه علي حدود مصر مع اسرائيل وبيجي سبع ايام في الشهر وكان معني كده ان الجهاز ملكي باقي ايام الشهر طبعا وقتها كنت بحب اقراء في كتلوجات الاجهزه الكهربائيه والتلفزيون وبكده كنت مؤهل للتعامل مع اول كتاب عن التكنولوجيا وكان كتاب تعليم استخدام مايكروسوف دوس وطبعا وقتها اوامر الدس كانت بالنسبه ليه زي الشفرات السحريه والتعاويز والطلاسم الي ممكن تفتح لي الباب لكشف السر الاعظم وكنت طول الوقت احفظ في اوامر استعراض الملفات وكتابة النصوص وحجات غريبه كده لحد ربنا ما فتح عليه وعرفت اذايي ادخل علي الويندوز متستغربوش وقتها برضه كان لسه الويندوز ده بيقول يا رب يا ساتر يعني ابتدينا سوا واول ما شفت الصوره بقت ازرق في ابيض بدل اسود في اسود حسيت بجمال الدنيا ولما فتحت الويندوز وشفت الصوره الاي مكتوب عليها اسمه حسيت اني في اهم لحظات حياتي وفي اسعدها في نفس ذات الوقت
لما قرائت ميكروسوفت ويندوز فور ويرك جروب 3.11 ياه علي الطفره الاي حسيت بيها
وزي مانتم شايفين في الصور قد ايه المتعه طبعا كنت بتعامل مع برامج البينت شوب والريكوردر
والفايل مانجر كئني بتعامل مع قمة التكنولوجيا واني اخيرا تخلصت من الوثنيه في الدس واتنقلت للنور
وفضلت في العالم ده 3 سنين لحد ما شافت عيوني بالصدفه جهاز مشغل ويندوز 95 طبعا
حسيت وقتها بخيبة الامل لانه كان حاجة اقوي واعظم ولاول مره عيوني تشوف قائمة ستارت
وشريط المهام طبعا مش ينفع يشتغل علي جهاز عمي المتهالك الاي كان تحفة الزمان من سنتين تلاته
لحد ما جبت اول جهاز كمبيوتر شخصي ووقتها كان الزمان عفي عن الويندوز ال 95 وظهر مفهوم جديد للتكنولوجيا مع ويندوز 98 وقتها عرفت ان الاي بيحب التكنولوجيا هو اول من يكفر بها لما ينزل تكنولوجيا احدث وطبعا بدات العجله في التحرك وظهر ويندوز ميلانيوم الاي كان بيمهد الطريق لتحفة الزمان والمكان
الويندوز اكس بي طبعا يوم ما حطيته علي جهازي صاحب البروسيسور تلات تلاتات يعني 333 والاي ميعرفش يعني ايه تلات تلاتات يبقا لسه جديد في التكنولوجيا طبعا اصاب الجهاز بالشلل
وبذلك وجب التجديد وجه الجهاز الجديد عام 2002 بسلامة الله ومعاه اقوي التطبيقات لويندوز اكس بي
ولان الطمع ثمه اساسيه لمحب التكنولوجيا مع ظهور ويندوز فيستا اعلنت العصيان ومن وقتها مشغلتش اكس بي علي جهازي الشخصي والاكس بي حكايه تانيه استنتها كتير قوي وفضلت مستنيها
بنسخ مقلده ولونج هورن ومفيش مانع نجرب مكنتوش وماك او اس وميلستون فايف وريد هات وحجات غريبه كده لحد ما ظهر الفيستا وعادة لقلبي السعاده
ولو اني بتمني دلوقتي الجديد لان الطمع هو داء التكنولوجيا
ده كان مشواري مع برامج التشغيل لسه بقا لينا حكايات تانيه كتير عن التكنولوجيا وذكرياتي معاها ورحلة مع التكنولوجيا دامت لمدة 15 سنه من عمري
ولسه مستمره لسنين وسنين جايه ان شاء الله