تاج رومنسي

يوما ما منذ عشر سنوات مضت وقفت ادنندن اغنية احبها جاء الي سمعي شخص بجواري يدنندن نفس الاغنية
هكذا كان لقائي الاول برومنسي
اكثر ما يعجبني في رومنسي انه انسان طيب واكثر ما كان غريب فينا سويا اننا لنا نفس الميول وقد اشتركنا سويا لسنوات مضت في حب الرومنسية التي جمعتنا سويا مع كاظم الساهر وكلمات اغنياته الساحرة وكتابة الشعر وسعيد انه رغم كل هذه السنوات استمرت صداقتنا وسعيد انه دخل عالم التدوين واكثر سعادة حين اقول انني عندما ادخل مدونته اشعر انني في عالمنا سويا فلقد صنعنا الرومنسية وحلمنا بها لسنوات وسنوات وسنوات مضت

لكن برضه الصداقة والاخوة دي هانت عليه وخلاني انا اول واحد يديله التاج تاج رومنسي طبعا عايز اخنقه اقصد اشنقه عفوا اقصد اشكره علي التاج الجميل وسعيد لما بلاقي المدونين بيتناقلوه بينهم انا هجاوب علي التاج بس انا حاسس انه واسع عليه قوي علشان كدة هجاوب بس علي اول سؤال فيه (وش بيضحك ضحكة شريرة) السؤال في اي العصور كنت تتمني ان تعيش؟ بصراحة انا في خمس عصور كنت اتمني اعيشهم انا عارف اني طماع قوي كدة بس انا فعلا اتمنيت اعيش الخمس عصور دول بيني وبين نفسي

العصر الاول

طبعا زي كل المدونين وكل المسلمين اتمنيت اعيش في العصر الاي شهد فجر الاسلام
عصر الرسول والخلافاء خاصة عصر الفاروق عمر
قد ايه العصر ده كان رائع والاسلام كان فيه في قمة مجده وشبابه واجمل الصفات الاي خلتني احب اعيش في العصر ده هو صفة العدل الاي للاسف بيشهد ازمة الان
واكبر دليل علي كدة ان واحد بقاله ثلاث سنوات متسبب في قتل اكتر من 1000 مصري
واخد برائة في اكبر فضيحة في تاريخ مصر الحديث
وواحد التاني مسجون بقاله اربع سنين علشان اتهموم انه زرو توقيعات خمسين مصري
علشان ينشيء حزبه السياسي الراجل الاي لو قال عايز ناس توقع هيلاقي ملايين
مؤمنين بفكره وبقدرته علي التغيير وواقفين وراه
وده ابسط مثال عن العدل في مصر

العصر الثاني

ناس كتير قوي ممكن تستغرب لما اقول ان العصر التاني هو عصر روايات الاديب العالمي
تشارلز دكنز فعلا انا كنت اتمني اعيش في لندن في اول عصر الامبراطورية الانجليزية
ياه العصر ده رائع لو حد فيكم متابع للعصر ده هيعرف انا اقصد ايه
واكثر حاجة شدتني للعصر ده هو النبل قد ايه عندهم كان في احترام كبير قوي
ونبل في التعامل بين الناس خاصة بين اوصات العائلات الكبيرة
اتمني اني اعيش في العصر ده واقعد الساعة الخامسة اشرب الشاي
في جلسة مع احد اصدقائي في العصر ده وهو بيحكيلي عن الثقافة والمجتمع الانجليزي

العصر الثالث

طبعا انا عمال اوديكم واجبكم انا نفسي ارجع لعصر رائع قريب مش بعيد
ياه لو يرجع بيه الزمن خطوة لعصر عبد الحليم والقي نفسي قاعد في حفلة عيد الحب في السبعينات وبسمع اغنية رسالة من تحت الماء
بجد انا بحسد بابا لانه حضر حفلة رسالة من تحت الماء وسمع موسيقاها لاول مرة
ياه لو فعلا نفسك تعيش عالم مختلف اسمع موسيقي بداية اغنية فاتت جنبنا
موسيقي البداية هتحس انك عايش علي جزيرة وقت الغروب وبينزل عليك من السماء فقاعات ماء وعلي خدك الساخن بتنزل فقاعة علشان تنتحر علي خدك وتولد جواك رعشة استمتاع

العصر الرابع

برضه وقت السبعينات بس مش في مصر في باريس بلد النور وبرج ايفل ونجوم الليل
والشموع والعطور وانا قاعد في مكان رومنسي بيطل علي برج ايفل وبسمع موسيقي
فرنسية قديمة ومعايا حبيبة جميلة وانا بقولها اجمل كلام الحب وهي بسحر عجيب
بترد علي حبي بحب اكبر واجمل

العصر الخامس

العصر ده لسة مش ليه وجود لانه لسة في المستقبل نفسي اعيش المستقبل
دلوقتي واشوف هبقي فيه اذاي هفضل اكتب في المدونة ولا لا
هيبقي شكل اسرتي اذاي وهتتحقق احلامي ولا لا
بس اوعدكم لو لاقيت انها متحققتش هفضل احاول احققها
نفسي كمان وانا في المستقبل اشوف التكنولوجيا وصلت لايه
ومصر لسة علي حالها ولا حصلت المعجزة واتغيرنا للافضل
واخبار مفاوضات السلام مع اسرائيل ايه ووصلنا لكام اتفاق جديد بدون جدوي


اقلكم علي حاجة بلاش نتمني العصر ده تعالو كلنا نصنعه ونشارك فيه
ومنبقاش علي الهامش