Thursday, April 17, 2008

بيع يا محمود




ومازالت المعركة مستمرة لتحرير طوابير العيش بالعبور نحو المستقبل وننتظر بفارغ الصبر الانتهاء من هذه المعركة لنواصل بعدها مرحلة الغموس لبناء معدة المواطن. فليس بالخبز وحده يحيا الإنسان لابد من غموس ومعاه حتة لحمة.

* دار هذا الحوار بين وزير البيع وبين رئيس الوزراء..

وزير البيع لرئيس الوزراء: صباح الخير يافندم الله أكبر وجه حضرتك صابح وصحة سيادتك ردة عن الأسبوع اللي فات. رئيس الوزراء! هات يا محمود من الآخر وخليك دقيق في كلامك، وزير البيع: إحنا يافندم اتعلمنا من سيادتك إن الباب اللي يجيلك منه الريح سده واستريح.

رئيس الوزراء: بلاش لت وعجن يا محمود وهات من الآخر..

وزير البيع: بصراحة يافندم أصبحت طوابير العيش خميرة عكننة علي الحكومة كلها.. فيه يافندم مستثمر هندي عاوز يشتري طوابير العيش اللي في المحروسة كلها وهيدفع مبلغ محترم.

رئيس الوزراء: اسمه إيه المستثمر ده يا محمود وإيه نظامه؟!

وزير البيع: مستثمر يافندم اسمه الثلاثي عيش كمارا مقمر وناوي يافندم يطور الطوابير هيعمل مظلة مكيفة وتحتها كراسي بالأرقام وهيركب دش لكل مظلة علشان المواطن مايشعرش بالملل..

رئيس الوزراء: عظيم يا محمود.. طيب وإيه المشكلة؟

وزير البيع: المشكلة يافندم إن المستثمر الهندي عامل رسم دخول ٥ جنيهات لكل فرد وجنيه لكل قفص وناوي يبيع كل رغيف بداخله صباع كفتة.

رئيس الوزراء: والرغيف بكام يا محمود؟

وزير البيع: في متناول الجميع يافندم بجنيهين فقط..

رئيس الوزراء: عظيم يا محمود بس أنا خايف جمهور الطوابير يعملوا مظاهرات والبلد مش ناقصة.

وزير البيع: يافندم الشعب بتاعنا شعب طيب ومسالم وزي العجينة بنشكله في إيدينا يعني مثلاً سيادتك لما خلينا العدس بعشرة جنيه حد اتكلم.

نبيع يافندم - بيع يا محمود
الموضوع منقول من جريدة المصري اليوم العدد 1404

13 comments:

  1. علي فكره يا جماعه انا بعتزر لمحمود
    خالص وعايز اقوله انا بحبك يا محمود

    هههههههههههههههه

    ReplyDelete
  2. على فكرة محمود ما هو مثال مش شرط يكون محمود أو محمد أو حتى تامر المهم أنه مثال عما يحدث لهذا الشعب الرائع من مآسى والصعوبات ومهما حدث سواء فى رغيف العيش او غيره فهذا الشعب صامد دائما مهما حدث لأنه شعب حباه الله بقدرة عجيبة على تحمل أى أزمة
    فهو شعب مصر
    شعب مضياف
    شعب كريم
    شعب ذكره الله فى كتابه الكريم
    ومتعلش ياعم محمود
    ممكن رغيف عيش بقى عشان
    ولا أقلك مش لازم نعمل رجيم وبلاها عيش
    ههههههههههههههههه

    ReplyDelete
  3. مسابقه
    فكر قليلا لتحصل علي جائزه قيمه

    مين هو محمود؟؟؟
    الزائر الاي يقدر يحدد مين هو محمود
    له جائزه قيمه

    تحياتي
    تامر الحسيني

    ReplyDelete
  4. ممكن بدل المسابقة نخليها فزورة اللى هيقدر يعرف هما كام محمود فى البلد وكام واحد نقدر نقول عليه محمود هيكون ليه جائزة كبرى
    وممكن هدية كبيرة
    ويلا افرح ياعم محمود هتبقى مشهورررررررررر
    ههههههههههههه

    ReplyDelete
  5. ممكن بدل المسابقة نخليها فزورة اللى هيقدر يعرف هما كام محمود فى البلد وكام واحد نقدر نقول عليه محمود هيكون ليه جائزة كبرى
    وممكن هدية كبيرة
    ويلا افرح ياعم محمود هتبقى مشهورررررررررر
    ههههههههههههه

    ReplyDelete
  6. عاوز تعرف مين محمود ؟
    إ تصل بخط الفرن الساخن
    من كل افران مصر
    هتلاقى محمود وعبود ومسعود
    يقفلوا الفرن ف وشك
    هههههههههههه

    ReplyDelete
  7. في وسط الطابور اللي ما شايف اوله

    كان كل أملي انا اشوفه او المسه

    اصل رغيف العيش يا ناس بقى من دهب

    قولولي طب نمرة موبايله ارن له
    *
    راح اللي كنت في عز جوعي باحن له

    بجد راح انا لسه فاكره وبارسمه

    اصله كان مالي عليا حياتي ومعدتي

    دلوقتي مش عارف اطوله ولا اعجنه
    ***
    كان الرغيف دايما معايا في شدتي

    وياما كمان هون عليا غربتي

    دلوقتي باتمنى ادوقه او احضنه

    ومش عارف اوصفلك يا حبيبي محنتي
    **
    بيقولوا خلاص يا رغيف مش هألمسك

    ولا حتى ادوقك ولا اغمسك

    وعملت ليك اجمد جنازة في معدتي

    ما كنتش اعرف اد ايه معزتك

    ReplyDelete
  8. هههههههههههههههه
    فكره حلوه قوي فكرة الفزوه يا
    smily rose
    اي كانت فزوره او مسابقه
    تامهم في الاخر نعرف مين محمود بالضبط

    اتصل الان
    لتحصل علي جائزه قيمه

    تامر الحسيني

    ReplyDelete
  9. اخي العزيز
    رومنسي
    من الخط الساخن بحييك
    علي الكلام الجميل والشعر الرائع
    اول مره اشوف شعر غزل صريح في رغيف العيش
    علي فكره يا احمد
    للاسف كلنا نحب هذا الشيء ولا نحصل عليه

    ادي حال الدنيا
    كلنا لها

    تحياتي

    ReplyDelete
  10. شكرا ليك يا انسان عاشق حر
    ع الكلام الجميل دا
    ودى مشكلتنا كلنا

    ReplyDelete
  11. طبعا احب احييك قوي على فكرة مين محمود
    بس قبل كدة احب افكركم بموضوع احنا مش نسيناه
    فاكرين الراجل صاحب الفرن اللي كان بيبيع الدقيق المدعم ويسرق اكل الناس الغلابة
    عارفين لما قالوا في كشك والناس هتشتري منه
    علشان نخفف ضغط الطابور
    تخيلوا الحرامي المصري
    اسفة صاحب الفرن عمل ايه
    المفروض ان كل ساعتين بيوصل للكشك من الفرن 2000 رغيف
    عارفين بقى يعمل ايه
    للشاب المصري اللي بياخد 450جنيه علشان يقف في الكشك
    اشتراه ب 20جنيه في اليوم
    مقابل ايه بقى
    مقابل انه مش يستلم العيش وياخد فلوسه كل ساعتين
    ويجي المفتش
    يلاقي الفلوس تمام وطبعا المفروض ان الطابور بيخف
    وعلشان التمويه
    بيحط له قفصين عيش جوة الكشك
    تمويييييييييييييييييييه

    وهو فعلا
    ال 450 جنيه يعملوا ايه لشاب مصري
    دول حتى مش هيكفوه يقف في الاستراحة بتاعة مستر عيش كمارا مقمر
    مش هنقول يشتري رغيق من جوة

    على فكرة الارقام صحيحة وحقيقية

    اما بقى عن محمود
    فكل واحد حصل قدامه الموضوع ده يبقى على طول محمود

    ReplyDelete
  12. شكرا يا عزيزتي
    lovly girl
    علي تعليقك وكشفك لحقايق توزيع العيش وده يوضح قد ايه في فساد في مصر
    وقد ايه لازم يبقا في وقفه حقيقيه ضد الفساد ده
    تحياتي

    ReplyDelete
  13. انا عرفت مين محمود ممكن بقى الجايزة...*_^

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد