Friday, May 30, 2008

المترو وأنا

زمان كان في فيلم اسمه اتنين تحت الارض
وكنا نسمع في الافلام العربي عن العالم السفلي والناس الاي عايشين تحت الارض
كل ده طبعا كان زمان لان معظم سكان القاهره دلوقتي بقوا عايشين تحت الارض
حتي اعلانات القنوات الفضائيه بقوا يقولو فيها هما عايشين تحت الارض واحنا فوق نكح تراب
ههههههههه
ما علينا
انا بصراحه من اهم رواد عالم تحت الارض ده عالم مترو الانفاق
تخيلو بقا كل شويه واخد الطريق من حلوان للمرج ومن شبرا للجيزه رايح جاي جاي رايح
حد قالي انه مش بيحب يركب المترو علشان لما بيركب المواصلات
بيقعد جنب الشباك ويتفرج علي الناس والشوارع بس متهيئلي الواحد ده انتحر من سنين طويله بعد ما خلاص ياس بسبب وشوش الناس الاي خلاص فقدت الامل في الحياه بسبب ارتفاع الاسعار والغلاء وطبعا الشوارع مش بقا فيها حاجه تتشاف غير اطفال الشوارع والزباله والشحاتين واللون الرمادي الاي بقا اللون المميز للقاهره
بسبب الدخان و الزحام واحد تاني بقا اعرفه من ايام الجامعه من كازخستان كان بيتعلم لغه عربيه في كلية الالسن جامعة عين شمس وقالي مصر بلدكم هتبقا حلوه لو بقا عندكم جليد زي عندنا
هتلاقي مصر في الشتاء بيضاء من الثلج وفي الصيف هتلاقي المباني كلها نضيفه بعد الثلج ميدوب
مش عارف ليه من وقتها بتخليل الشعب المصري هيمشي اذاي في وسط الجليد ده
واتخيل واحد قاعد علي الرصيف مادد ايده وبيقول لله يا محسنين يلاقي ربنا فرجها عليه بحتة ثلج حلوه وبرضه الثلج الابيض ينفع في اليوم الاسود
المهم اني مستني بفارغ الصبر الخط الثالث لمترو الانفاق علشان اروح العباسيه بالمترو
وارتاح من التراب الاي فوق الارض بس للاسف المترو كمان اتغير مش هوا المترو الاي عرفناه زمان
يعني في المترو دلوقتي بقا فيه باعه جائلين وكمان متسولين
وتبص علي العربيات من جوه تلاقي مكتوب اعلانات مندوبين المبيعات
واعلانات انقاص الوزن وتكبير ايه وتصغير ايه وزرع الشعر ونقله من المناطق الماهوله للمناطق غير الماهوله شعرايه شعرايه
وحجات غريبه قوي بتفكرني باتوبيس النقل العام ربنا يتوب علينا منه يارب
طبعا سبب انتظام الناس في المترو زمان انهم كانو عارفين ان في نظام
وان فيه كاميرات مراقبه وناس تخاف تدخن علشان الغرامه
وللاسف هو ده النظام الناجح في مصر عايز مصر تمشي زي الساعه
الاي يخالف اشارة المرور اقطع رجله والاي يشيل سجاره في مكان عام اقطع ايده
طبعا الشعب كله هيمشي مقطوع الايدي والارجل ده اول خاطر هيخطر في بالكم بعد كلامي
بس لا ده مش صح للاسف لو واحد بس اتقطع رجله هتلاقي مصر بقت زي الساعه
والناس ماشيه خايفه تغلط في الشارع او المواصلات او في اي شيء
لانها عارفه ان فوق دماغهم كده حد بيبص عليهم ويراقب
ولو مش مصدقني جربوا ولو مره واحده واحد كده يكون فدائي وقتها ويجرب يخالف القوانين
والداليل الحزام بتاع العربيه الناس بعد ما شافت الغرامات في التلفزيون بقت تمشي بالعربايت منغير عجل بس تمشي بالحزام علشان متاخدش مخالفه
للاسف انا مش شايف اي حل غير تغيير القوانين علشان يبقا في حل لازمة الانسان المصري المعاصر الاي خلاص اتعود علي العين الحمرا واحب اشكر كل من يستخدم العين الحمرا مع الشعب المصري لانه ذكي وقدر يفهم الشعب كويس وعلي راي عمرو اديب
هتلاقو مصر بقت فله شمعه منوره

2 comments:

  1. هههههههههههههههههه
    على فكرة يا تامر مش لوحدك من رواد تحت الأرض انا فكرة أول مرة اتعرفت فيها على المترو ودا كان أول سنة لى فى الجامعة وكانت أول سنة لى فى المدينة الكبيرة القاهرة كنت أول مرة فحياتى اتعود على السفر لمدينة القاهرة عشان كلية فى جامعة عين شمس كان كل شئ لى غريب بس كنت فرحانة وكانت اول مرة لى اركب فيها المترو كان شئ جميل لأن المترو مكنش زى دلوقتى كنا فى أواخر التسعينات وكان فيه التزام ومحافظة مش زى دلوقتى مكنش فيه باعة جائلين ومكنش فيه ازعاج المهم لى ذكرى حزينة مع المترو كنت انا وصيقتى نجلاء رحمها الله كنا دايما بنحب نركب المترو ونذاكر فيه وخصوصا ايام الأمتحانات فكنا نركب لحد حلوان ونرجع تانى لحين قرب موعد امتحانا وكان بيساعدنا على ذلك ان امتحاناتنا كانت مسائية وفضلنا على كدا فترة لحد ما فرقنا الشئ دايما يفرق اى اتنين الموت سابتنى وكانت هى صديقتى الوحيدة ومن يومها كل يوم فى ذكراها اروح المترو واقعد فى نفس العربة الثالثة ونفس الكرسى واحس انها معايا
    ساعات حاجات زى دى بيكون ليها علامات فى حياة الانسان ومع انى فضلت فترة طويلة جدا اهاف اصاحب حد الا ان الحياة مش بتتوقف على موت حد
    معلش نكدت عليك بس انا عاوزة اقول ليك ان الشعب بتاعنا والله شعب جميل ومش حكاية ان العين الحمراولا الخضرا هى اللى بتعرف تتعامل معاه والله شعبنا رائع وجميل ومش محتاجة غير ايد صادقة وضمير صاحى يرجع للشعب دا كل حاجة جميلة ضاعت منه
    وبعدين لو مصر بقى فيها جليد يبقى مش هيجلنا سياح لأننا احنا اللى هنبقا سياح
    بذمتك مصر دى بشعبها فيه زيها برغم كل السلبيات وكل الأزمات شعب جميل ودمه خفيف
    ومش محتاج عين حمرا ولا خضرا محتاج ضمير وقلب واحساس
    هههههههههه
    سلام

    ReplyDelete
  2. 福~
    「朵
    語‧,最一件事,就。好,你西...............................................................................................................................-...相互
    來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد