Friday, June 5, 2009

انتحار طفل

كل من يعرفني يقول لي اني حين اتحدث عن الماضي والذكريات
يري في عيوني فرحة غريبة
رغم اني لا اتحدث كثيرا عن ذكرياتي الا لاقرب الناس الي نفسي
ولقد حاولت ومنذ اكثر من عام ان اتحدث عن ذكرياتي في المدونة
وقمت بالفعل بانشاء تصنيف فضفضة
لكن كان بداخلي دائما ما يمنعني ان اتحدث عن ذكرياتي
لكني قررت ان اتحدي ما بداخلي
وادخل معكم عالم الطفل الصغير تامر

اول حاجة فاكرها من طفولتي اني كنت طفل مش عادي
كنت حاسس بنفسي كدة
وانا صغير كان عندي بيانو وكنت بحب قوي محالولاتي الاولي في
العزف عليه ومن المواقف الطريفة في حياتي اني في ثالثة ابدائي
كانت اول محاولة انتحار في حياتي
اذاي بقي
كنت علطول بنسي الكتب وضاع مني كتاب العربي
وكانت دي تاني مرة يضيع فيها كتاب العربي وكنت زعلان قوي
ومن جوايا كنت عارف ان بابا هيزعل مني وفضلت افكر اني دائما
بعمل حجات تزعل بابا وجدتي وكل الناس الاي بيحبوني
علشان كدة فكرت اني لازم اسيب المدرسة والبيت وابعد
وفعلا مرجعتش علي البيت وفضلت اتمشي في الشوارع
وفكرت اني لما ابعد مش هلاقي مكان اروحه وانام في الشارع
وابقي زي اطفال الشوارع وقلت ممكن اشتغل واكسب بعرق جبيني
واول شغلانة خطرت ببالي اني أبقي صبي ميكانيكي سيارات
واشوف الاطفال بتروح المدرسة والجامعة وانا غرقان شحم وزيت
بس قلت لا الشغل مش عيب بس لو ملقتش شغل ممكن انحرف
واسرق وابقي مجرم علشان اعرف اعيش واكل
وفضلت اتخيل مصيري وانا بهرب مخدرات والبوليس بيقبض عليا
ومصيري يبقي في الاخر الاعدام
بس قلت كدة برضه هزعل الناس الاي بحبهم مني
علشان بقيت مجرم يبقي الحل الوحيد اني انتحر
انا احسن ما هما يعدموني
وفعلا روحت البيت وتاني يوم قبل مروح المدرسة قبل ما بابا يروح
شغله سلمت عليه وبسته واختي الصغيرة كانت نايمة بوستها وانا
عيني هتدمع وبوست جدتي وقلت ليها متزعليش مني واستغربت
اني قلت كدة
كنت بودع كل حاجة البيت والشوارع والطريق للمدرسة
وفي جيبي علبة اسبرين كبيرة
ورحت المدرسة وقررت اني احاول محاولة اخيرة واسئل زملائي عن
الكتاب بس للاسف محدش شافوا استاذنت من المدرسة علشان
اروح اشرب واخدت 10 حبات اسبرين
بعد اخر حبة اخدها لاقيت واحد زميلي جنبي بيقولي انت فين يا
ابني انا لاقيت كتابك امبارح ونسيت اقلك
وقتها كنت هبكي من الفرحة ورجعت الفصل ونسيت اني انتحرت لحد ما
فجاه حسيت ببرد شديد ولما سالتني المدرسة مالك مقدرتش ارد
ودي كانت اول محاولة انتحار في حياتي
طبعا عشت بعدها الحمد لله امال بكتب البوست ده اذاي :)
ولحد النهارضة محدش سمع الموقف ده غير واستغرب قوي علي اسلوب تفكيري
حتي انا نفسي زيهم بستغرب

Posted by

20 comments:

  1. romansyJun 5, 2009, 4:00:00 PM

    اول تعليق

    ل


    رومانسى


    فينك يا تااااااااااامر

    بقالك زمن

    ReplyDelete
  2. romansyJun 5, 2009, 4:06:00 PM

    ماشى يا عم المنتحر
    كتاب العربى يعمل فيك كده اومال بقى لو ضاعت الشنطه بحالها كنت هتعمل ايه
    اوقات كتير الانسان مش بيحكى اللى جواه لاى حد وبيخاف حتى يحكى لنفسه
    بس الفضفضه جميله وانت عارف بق يا تاتو
    اا بشكى لمين واحكى لمين
    اهى دنيا بتلعب بينا

    واحشنى قوى يا تامر
    وعاوز اشوفك قريب

    ReplyDelete
  3. Tamer AlhosinyJun 5, 2009, 5:57:00 PM

    لو الشنطة كلها ضاعت كنت انتحرت في المدرسة
    ههههههههههههههههههههههه
    انا نفسي بستغرب لما افتكر كنت بفكر اذاي ولو ان في حجات مشتركة بين تفكيري كطفل وتفكيري الان

    تحياتي يا احمد
    وان شاء الله لينا لقاء قريب

    ReplyDelete
  4. EMMY BABYJun 5, 2009, 6:34:00 PM

    ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه بجد والله يا تامر انا فطست على نفسى من الضحك

    ياخراشى بموت جدا فى براءة الاطفال دى

    وعجبنى اوى اوى احساسك باللى حواليك فى انك خايف على زعل بابك وجدتك

    وعجبنى حنانك وانتمائك لكل حاجة فى البيت هههههههههه

    لا وايه خيالك واسع اوى وتفكيرك مرتب ومنطقى من وانت صغير

    والحمد لله ان الاسبرين معملش مفعول ياما كنا هنخسرك للابد

    تحياتى

    ايمى

    ReplyDelete
  5. EMMY BABYJun 5, 2009, 6:40:00 PM

    على فكرة مبروك الهيد الجديد بجد تحفة انا بحب اللون النارى ده جدا

    ReplyDelete
  6. kmtJun 5, 2009, 6:53:00 PM

    السلام عليكم ورحمة الله وبركاته

    ههههههههههههه
    انت كنت غاوي افلام فريد شوقي جعلوني مجرما
    غريب جدا انك وانت عمرك حوالي 6-7 سنين تفكر كده

    مبعدين انت بتقول اول محاوله
    اكيد في محاولات فاشله اخرى الحمد لله انها بتفشل

    ممكن الواحد يفكر في الموت لكن انه فعلا يقدم عليه فدا صعب

    ربنا معاك

    تحياتي
    الى اللقاء

    ReplyDelete
  7. KiaraJun 5, 2009, 7:11:00 PM

    اقولك بقي انا موش استغربت من الموقف

    لان كان بابا عامل ليا شهاده في البنك ولاخويا وانا كنت فرحانه بيهم وبعدها ضاعت مني وبابا فضل يسالني ودتها فين اقوله موش عارفه كنت انا ساعتها في اولي ابتدائي وقعدت ادور عليها واعييييييييييييط اعييييييييييييط وقررت عشان موش ازعل بابا مني اني انتحر وجريت جبت سكينه من المطبخ وكنت هموت نفسي واخويا محمد اخدها مني رحت جيبت حبل وكنت هعمله مشنقه ومحمد ينقني ويكتفني عشان موش اموت نفسي وماما جت وتقولي ياهبله وقعدت تطبطب عليا وتهديني واتكلمت معايا وفهمتني اني كنت هغضب ربنا وموش لما تضيق بينا الدنيا ننتحر لا نقول يارب وقالتلي طيب ادعلي كدا يارب ياجامعه الناس اجمعني بضالتي وفضلت اكرر معاها الدعاء ولقيت الشهاده وكان درس اتبني جوايا من طفولتي لحد الان

    ReplyDelete
  8. Tamer AlhosinyJun 5, 2009, 8:36:00 PM

    ههههههههههههههههههه
    مرسي قوي يا ايمي علي كلامك الجميل ده عن البرائة والتفكير المرتب
    هههههههههههههههههههههههه
    بس متنسيش ان تفكيري ده كان هيخليني انتحر
    ههههههههههههههههههههههههه
    بجد مرسي قوي لتعليقك الجميل

    تحياتي
    تامر الحسيني

    ReplyDelete
  9. Tamer AlhosinyJun 5, 2009, 8:42:00 PM

    عزيزتي كيمت
    اولا احب اشكرك علي تعليقك الجميل
    دي فعلا اول محاولة فاشلة لية بس التانية بقي مش هقولكم عليها لان لحد النهارضه مش عارف هي هتفشل ولا لا
    هههههههههههههه
    اصلها لسة محصلتش

    اما بقي عن افلام فريد شوقي وجعلوني مجرما

    انا بجد من طفولتي خيالي جدا جدا جدا
    مكنتش محتاج اتفرج علي افلام بجد
    هههههههههههههههه
    فاكر وانا صغير لو شفت فيلم وبابا قالي قصته ايه احكيه ليه يعجبوا قويولما يشوفه يلاقيه حاجة تانية يقولي انت جبته منين اضحك واقول اصله معجبنيش كده احلي
    هههههههههههههههههههه
    مش بقولكم انا بستغرب نفسي والله

    ReplyDelete
  10. Tamer AlhosinyJun 5, 2009, 8:50:00 PM

    ههههههههههههههههههههههههه
    شفتي بقي يا كيارا ان في حجات مشتركة بينا
    علي فكرة ده نوع من الحساسية الشديدة في الطفولة
    عارفة وانا صغير كنت بحس اني مش عندي جلد
    لاني كنت بحس ان الجلد هو الفاصل بين الانسان وكل حاجة حواليه ومن كتر احساسي بجد
    كنت بحس انه ملهوش وجود

    تحياتي لتعليقك الجميل

    ReplyDelete
  11. yoyoJun 6, 2009, 3:07:00 AM

    صباحك سكر يا تيمو

    حمد لله على سلامتك نورت مدونتك مرة تانية
    وياريت مش تغيب علينا كدا تانى

    التحديت اللى موجود فى الصورة جميل اوى الصورة نفسها روعة
    فعلا لولا الاختيار ما كانت الجنة و النار فدوما الاختيار يكون صعب يبنى و يهدم فى ذات اللحظة وحينها يكون من الصعب ان نتراجع فى القرار


    البوست و الله زى السكر
    ههههههههههههههه
    مش هانكر انى حسيت بخوف من العنوان " انتحار طفل "
    يعنى انتحار البراءة و النقاء و الطهر
    الموقف اللى حكيت عليه يا تامر بيدل على انك انسان بتراعى مشاعر الناس اهلك والناس اللى بتحبهم جدا وان ايما عاوز تكون عند حسن ظنهم بيك
    وكمان تحمل مسئولية من زمان اهوا بقى
    امال بس لو كنت ضيعت كتابين تالتة كدا ولا حتى الشنطة بحالها
    ان زمانا بقى بنتفرج على برنامج خلف الاسوار
    هههههههههههههههه
    وقولى يا تامر يا بنى ايه السبب اللى خالك تهرب المخدرات ؟!
    انا برئ برئ
    اهىء اهىء اهىء
    انا ضحية كتاب العربى
    هههههههههههههههههه


    عسل والله يا تامر
    يارب يطول فى عمرك يارب
    ربنا يسعدك ويسعد قلبك الطيب
    تحياتى
    يويو

    ReplyDelete
  12. MOHAMMED ELBANNAJun 6, 2009, 8:59:00 AM

    تامر الحسيني
    اخى وصديقي
    بصراحه البوست ممتع قوي وجميل وحسيت
    فية بروح الطفوله الشقيه اللي دايماً
    بشوفها في عيونك
    ايه كل الشقاوة ديه يا عم تامر
    ربنا يستر ومحدش من ولادنا يقرا البوست دة
    تقبل تحياتي ومروري
    اسعدني تواجدك
    محمــد البنا
    طريق النجاح

    ReplyDelete
  13. زى الهواJun 6, 2009, 11:23:00 AM

    ههههههههههههه

    انا برده بحب اوى اسرح ف الماضى كان نفسى الزمن يقف لغاية الكلية ويقعد يعيد ف نفسه , بس تصدق عمرى ما انتحرت , اصل انا كنت طفلة جبانة اوى

    حتى لما كنت ألعب مع العيال جيرانى ماكانوش يرضوا يلعبونى معاهم , او ممكن مثلا يلعبونى بوابة ويلعبوا هما ويخلصوا لعب وانا واقفة عند البوابة ماليش لزمة

    كنت طفلة رخمة وديما كنت احب اخد اى حاجة مع اخواتى , وبابايزعقلهم , ادووووووووها علشان هيه الصغيرة

    بس بقى ماتخلينيش استرجع احسن ايامى

    ReplyDelete
  14. صوت من مصرJun 7, 2009, 1:13:00 AM

    هههههههههههههههههههه
    جامده موت بجد عارف احلاها انها تنفع ست كوم للاطفال وعلى فكره فكرتنى بذكريات طفولتى فى المدرسه
    انا حاليا بسمع اغانى قديمه عشان تذكرنى بالماضى لكن اسلوبك افضل 14 مره من الاغانى
    وعموما مش هقولك متحوليش تنتحر تانى لان الاسبرين مش بيعمل حاجه

    ReplyDelete
  15. UnknownJun 7, 2009, 5:51:00 PM

    افهم من كلامك انها مكانتش محاولة الانتحار الوحيدة؟؟؟

    ReplyDelete
  16. Tamer AlhosinyJun 8, 2009, 5:17:00 PM

    عزيزتي يويو
    عاملة ايه اتمني تكوني بخير وسعيد اني رجعت من جديد ولو اني مش رجغت ولا حاجة

    فعلا الموثق بيبين قد ايه في طفولتي كنت حريص علي مشاهر الاي بيحبوني

    طبعا مش في طفولتي بس
    وعلشان كدة اوقات بواجه اختيارات صعبة
    ومسنحيلة لما تتعارض المةاقف وابقي مطر اوعل حد بحبه والا هيزعل حد تاني بيحبني

    تحياتي
    تامر الحسيني

    ReplyDelete
  17. Tamer AlhosinyJun 8, 2009, 5:19:00 PM

    اخي وحبيبي محمد البنا

    عامل ايه واحشني جدا ومفقفدك بجد
    واتمني نتقايل قريب قوي وسعيد ان البوست عجبك
    والشقاوه بقي

    بعض من ما عندكم

    تامر الحسيني

    ReplyDelete
  18. شمس النهارJun 10, 2009, 4:03:00 AM

    مش عارفه ياتامر لما بأحب اعلق عندك بحس اني داخله مغارة علي بابا
    لازم سبعين محاوله عشان اعرف اجيب مكان التعليق يابني سهلها لعواجيز التدوين امثالي:)

    البوست تلقائي وجميل جدا
    وصورتك وانت صغير لطيفه وعينيك كلها ذكاء وشقاوه
    ربنا يحميك
    هو تصرف طفولي جدا وعفوي
    يدل علي انك حساس جدا
    الحمد لله ان ربنا ستر
    ماكناش هنقرا البوستات الجميله دي
    والاشعار الرقيه

    ReplyDelete
  19. عمرو وجيهJun 11, 2009, 6:18:00 PM

    السلام عليكم إزيك يا تامر

    ده انت كنت شقي جدا و انت صغير

    بتفكرني بنفسي وانا صغير كنت كده برده

    انا برده في يوم كنت هنتحر زيك كده بس بطريقة ابشع


    في مرة قلت لبابا عاوز لعبة الكلام ده

    و انا عندي مثلا

    6 7 سنين


    قام قالي لا مش هجيب عشان انت بتكسر اللعب

    بس قومت معيط و جت في دماغي فكرة اني انتحر


    رحت قلت بس انا اي عربية معدية
    هرمي نفسي قدامها

    بس قعدت افكر بقي ايه مصيري


    بس بعد كده لقيت بابا بيندهني وبيقولي تعالي هنا بعيد عن العربيات


    بس

    و لو هو مكنش نده كان زماني مكنتش موجود

    يالا بقي الواحد و هو صغير كان عبيط اوي

    هههههههههههه


    بجد وحشاني مدونتك يا تامر

    تحياتي لك

    و شكرا لانك بجد فكرتني بذكرياتي



    سلام يا كبير

    ReplyDelete
  20. AnonymousSep 23, 2009, 4:21:00 PM

    طب تعمل اية لو ضاعت شنطتك وحذائك وتروح البيت من غيرهم تعمل اية؟؟؟؟؟؟؟؟؟؟

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد

Subscribe to: Post Comments (Atom)