Wednesday, October 22, 2008

الازمة المالية العالمية+ تحديث1

الازمة المالية العالمية + تحديث هام

طبعا كتير منكم مكنش يتوقع اني اتكلم عن موضوع زي ده خاصة اني مش عملت موضوعات اقتصادية قبل كدة ولو ان الاقتصاد من اهم العلوم التي يجب ان نهتم بها لانها بتاثر في حياتنا اكتر كمان من السياسة وانا من المهتمين جدا بالاقتصاد ليس فقط بحكم دراستي او عملي بل لان الاقتصاد علم له حث فني عالي ويحتاج لمهارات كتير للتميز فيه


طبعا كتير منا سمع عن الازمة المالية العالمية في بعضنا عرف اسبابها وبعضنا تاه في المصطلحات التي يتم بها شرح الازمة اسمحوا لي ان اقدم لكم شرح للازمة بشكل مبسط ويربطها بحياتنا لكي يعرف كل منا تاثير الازمة علي حياته الشخصية

بدات الازمة في التكون من حوالي 4 سنوات وحدثت في النظام المصرفي اي في البنوك والبورصة وتبدا القصة برغبة الامريكان في ملكية المنازل زي اي حد في العالم حتي هنا في مصر اسعار المنازل عالية
والبنوك بتقوم باعطاء قروض للشخص ليقوم بشراء منزله ويقوم بتسديد اصل القرض والفوائد علي اقساط وطبعا الفكرة دي انتشرت جدا في امريكا وناس كتير كانت ساكنة في منازل قررت تستغني عنها وتشوف منزل اكبر وافضل لان البنك كان بيدي تسهيلات عالية جدا وبضمانات قليلة
لكن فجاة عدد كبير من المقترضين في البنوك توقفوا عن السداد وده ادي الي ان السيولة الاي في البنك تقل

يعني ايه سيولة؟
البنك بياخد فلوس من المدخرين ويديهم عليها فوائد بنسب قليلية 10% مثلا
ويدي الفلوس دي لناس عايزة قروض بنسبة فائدة 12 % والفرق بين النسبتين هو مكسب البنك بس البنك مش لازم يطلع الفلوس كلها
لازم يبقي عنده فلوس احتياطي علشان لو اي حد طلب سحب فلوسه في اي وقت يجدها وهي دي السيولة وبتبقي ليها نسبة من راس المال
وكل ما السيولة زادت بقي موقف البنك افضل


وفي امريكا بسبب توقف المقترضين عن الدفع قلت السيولة
لدرجة ان اي حد محتاج يسحب فلوس من البنك مش بيقدر ياخد فلوسه
وبكدة البنك بيعلن افلاسه طبعا في اسباب تانية مهمة جدا
ادت للازمة في سبب اضافي انا شايف انه يستحق الذكر
هو فشل نظام جورج بوش المالي لانه انفق بلايين الدولارات علي الحرب علي الارهاب
في السبع سنوات السابقة وده برضه ادي لتدني السيولة في امريكا
وبقت مشكلة العقارات في امريكا القشة التي قسمت ظهر البعير
او الحجة التي بيختفي ورائها بوش ونظامه الفاشل ويدعي ان المشكلة في الشعب نفسه وقدرته علي السداد لديونه

بس المشكلة في النظام المالي ككل انه زي الشبكة المترابطة
يعني خسارة بنك وافلاسه بياثر علي باقي البنوك مش في بلده بس لا في العالم كله
يعني مثلا بنك هنا في مصر بيحط فلوسه في بنك في امريكا والبنك فلس
يبقي البنك المصري فلس لانه فلوسه راحت هو كمان وطبعا اعلان افلاس بنك بيادي
لتراجع اسهمه في البورصة بشكل كبير وبياثر علي البورصة ككل وده يودي لتراجع البورصة وتراجع بورصة وول ستريت في اميركا ادي لتراجع بورصات العالم ككل
خاصة البورصة المصرية لان الاجانب باعوا اسهمهم فيها علشان يعوضوا خسائرهم في
اميركا وبالتالي وقعت البورصة المصرية
وهكذا تدور الشبكة لنكتشف ان مشكلة في امريكا بتاثر علي اقتصاد العالم بالكامل


والعالم الان مهدد بحالة كساد عالمي جديد يعني الناس مش هيبقي معاها فلوس تشتري احتياجتها الاساسية او تبيع
واخر كساد عالمي حصل هو الكساد العالمي الكبير سنة 1929 الاي غير سير العالم
واستمر ل 3 سنوات كاملة
لكن للاسف الكساد الحالي اضخم واكبر لانه طال انشطة كتيرة
ولان العالم دلوقتي في زمن العولمة بقي مترابط اكتر يعني الازمة علي الكل


طيب ايه علاقة الازمة دي علينا احنا كمصريين
طبعا لان الغرب بيمر بالكساد يبقي معندوش فلوس يعمل سياحة
يعني انخفاض في السياحة وكمان مش هيجي يستثمر فلوسه في مصر
ده بالاضافة ان صادرات مصر للعالم هتنخفض جدا وقناة السويس مش هتجيب زي الاول لان التجارة العالمية هتقف وكمان صناعات الملابس الجاهزة الاي كانت بتعتمد علي اتفاقية الكويز واتفاقية اغادير مش هيبقي ليها فرصة تتصدر ده كمان غير انخفاض اسعار البترول والحجات دي هي مصادر الدخل في مصر
يعني مصر هتعيش الفترة الجاية ظروف كساد صعبة قوي
والمشكلة الاكبر ان ده جاي في حالة التضخم
يعني الغلاء ودول الاتنين عكس بعض ولما بيحصلو مع بعض
بتبقي المشكلة مضاعفة لان الكساد بيخفض الاجور فتخيل اجور تخفض واسعار الغذاء ترتفع يعني بين المطرقة والسندان

بس في ظل الوضع ده في فرصة ذهبية لمصر وللحكومة بس هل الحكومة الحالية وصلها الافكار دي لا اعتقد ذلك اول حاجة ان الدول العربية الخليجية هتسحب فلوسها من امريكا ومن اوربا علشان الازمة متاخدش ما تبقي منها وفي معلومة مؤكدة ان خسائر دول الخليج تفوق سعر البترول الذي انتجته دول الخليج في العشر سنوات السابقة يعني خسارة كبيرة جدا يعني الاي جه من الابار طول السنين الاي فاتت طار في الهوا وكمان برميل البترول الاي كان ثمنه 150 دولار بسبب الازمة ثمنه بقي 70 دولار
ولن يرتفع الي 100 دولار قبل عام 2012 يعني ذلك انهم اكثر منطقة خسرت في العالم بالكارثة دي
وهما هيحاولة يقللوا الخسارة بسحب الباقي ولو مصر استغلت الفرصة وقدرت تقنعه بالاستثمار في مصر دي هتبقي انطلاقة لمصر وهتخلي مصر تطلع من الازمة دي الفائز الاول
خاصة ان الازمة ليها بعد كمان مشرق
علي الكيان الاسرائيلي لان الاقتصاد بتعهم معتمد علي المعونات الخارجية والتحويلات
من يهود الغرب لاسرائيل
وفي الظروف الحالية هتقل جدا الاعانات دي وهتبقي مرحلة صعبة جدا علي اسرائيل
يعني لو العرب استثمروا فلوسهم في العالم العربي بعد فشلهم في الغرب
واسرائيل ضعف اقتصادها بسبب ارتباطها بالغرب يبقي اتغيرت الخريطة وبقا العرب اقوي
من اسرائيل شفتم بقي قد ايه الاقتصاد بيلعب بالسياسة الكورة

للاسف دي اخر فرصة لاننا كعرب نعمل حاجة
الازمة زي ما فيها نقط سلبية جدا النقطات الايجابية فيها ممتاذة
بس لو قدرت الحكومة تقتنصها وتطبقها
بس مين يسمع ومين يقراء

اتمني تكون الصورة وصلت ليكم بشكل كويس ولو اي حد فيكم عنده اي سؤال
في التحليل ده او في اي حاجة اقتصادية يحب يعرف عنها او مصطلح مش فاهم معناه وبيسمعه كتير يسعدني الرد عليه وافادته بيها


تحديث هام
حدث تطور هام اليوم يوكد صحة التحليل الذي قمت به للازمة ويؤكد ايضان ان مصر لا تسير في الاتجاه الخاطيء حيث جاء الخبر التالي في جريدة الجمهورية اليوم

الدوحة - الكويت:
تسلم سمو الشيخ حمد بن خليفة آل ثاني أمير قطر أمس رسالة خطية من الرئيس حسني مبارك خلال استقباله المهندس رشيد محمد رشيد وزير التجارة والصناعة... تتعلق الرسالة بتعميق وتوسيع علاقات البلدين الاقتصادية.. وفي إطار بناء موقف عربي موحد نحو التكامل الاقتصادي كمحور مهم لمواجهة تداعيات الأزمة المالية العالمية. كما استعرض وزير التجارة والصناعة والشيخ حمد بن جاسم بن جبر آل ثاني رئيس الوزراء علاقات التعاون الثنائي بين البلدين الشقيقين.


بناء موقف عربي موحد نحو التكامل الاقتصادي كمحور مهم لمواجهة تداعيات الأزمة المالية العالمية
هذا هو الهدف الذي يجب ان نسعي اليه الان
وانا اقترح الدعوة لعقد قمة اقتصادية عربية يعقد فيها ورشات متخصصة بكل الصناعات العربية
وفرص مشاركة راس المال الخليجي لتطويرها والاستثمار فيها

اتمني ان تتحقق هذه الامنية كما تمنيت ان تري الحكومة نفس وجهة النظر التي توصلت اليها من خلال تحليلي المتواضع



60 comments:

  1. بجد يا تامر والله اسلوبك بسيط جدا فى توصيل المعلومة يعنى انا عن نفسى لو شفت حاجة اقتصادية او مليش فيها مبكملشى قراية بس بصراحة الاسلوب البسيط شدنى انى اكمل قراية وبالتالى بجد الصورة اتضحت جدا

    يعنى احنا لو عرفنا نستغل الفرصة الذهبية دى بجد هنبطل نقول ماما امريكا بمعونتها لان ساعتها هنكون احنا المسيطريين

    شرحك بجد للعلاقة مابين خسارة امريكا وخسارتنا احنا كعرب عجبنى اوى لانها كانت بالنسبة لى حاجة جديدة مفكرتش فيها قبل كدة

    وكذلك برضه شرحك للسيولة طب وياترى قلة السيولة ده بيحصل نتيجة جشع البنوك فى استغلال كل الفلوس ام انه عدم تخطيط للموقف المالى بشكل جيد ؟

    واتوقف لفترة عن التدوين بس انا مش حبيت مهما فقدت من ناس غالية في حياتي اني اتوقف عن اني اكون معاكم

    يارب فعلا متتوقفشى عن التدوين لانك فعلا تعتبر كنز لعالم التدوين لا يمكن الاستغناء عنه

    واتمنى ان الظروف يكون قل تأثيرها وتكون نفسيتك بقت كويسة

    موضوع راع فعلا يا تامر وحمد الله على سلامتك

    تحياتى

    ايمى

    ReplyDelete
  2. تامر
    انتى فينك واحشنى بجد
    شكرا على البوست الجميل اللى بيحكى ظروفنا كلها
    بس انا نفسى اقولك حاجه انت مش تنفع محاسب بس
    انت تنفع محلل سياسى
    واقتصادى
    ياريت يا تامر
    تطمنى عليك

    رومانسى

    ReplyDelete
  3. بجد رائع قوى التحليل الإقتصادى ده للموضوع
    وكون إنى العرب يستغلوا الفرصة
    ده حلم
    ربنا يهديهم
    تحياتى
    دمت بود

    ReplyDelete
  4. ازيك يا قمر :)

    دى اول مرة ليا اكون متواجد معاك فى هنا وان شاء الله مش هتكون اخر مرة

    اما بالنسبة لموضوعك المدهش ووسده البسيط جدا انا بحييك عليه

    ومن حكم شغلى .. اقدر اقولك ان البورصة فى حالة انهيار تام للاسهم .. انا مش فى مصر يا تامر بس طبعا بحكم شغلنا احنا بنتابع معظم البورصات زى مصر والخليج وشرق اسيا وغيرها ما علينا

    طبعا احنا هنا متكتفين ومش فاهمين ايه اللى بيحصل من انهيار غير طبيعلا وصل ل 25% يعنى صورة غير طبيعيه وده طبعا بيعكس حال السوق

    ومش عايز اقولك اننا مهددين باننا نخسر شغلنا :) حاجه حلوة اوى ما علينا ربنا يستر

    واللى انت قلته صح لان فيه اسهم كتير جدا كمان تابعه لهيئات اجنبيه على مستوى عالى وانهيار الاسهم بيعنى انهيار تام ليهم .. مش عايز اقولك ان شركو اوراسكم مثلا وصلت خسايرها لميار جنيه وانها اشترت ب 80 مليون قيمة اسهم عشان تحافظ على سعر السهم

    غير عمليات الشراءاللى بتم من الباطن تبعهم طبعا واحنا بحم شغلنا بنكون فاهمين ده كويس لانه اعتيادى ولعبة البروصة كبيرة

    فرصتنا فعلا كبيرة زى ما ذكرت بس مين يقرا

    ربنا معاك يا بطل

    وشفت انك قلت انك كنت مختفى .. يارب يكون خير ونشوفك معانا دايما

    من قلبى بدعيلك .. ربنا يوفقك

    وليك منى :)

    من بعيد .. بكتبلك

    ReplyDelete
  5. بجد الموضوع اكثر من رائع وانا فعلا ما اتعودتش اقرا اكتر من عناوين الاخبار والجرايد فى اخبار السياسه والاقتصاد وبالتالى بفهمش قشور المشكله بس لكن اول مره حقيقى افهم بالوضوح ده تسلم ايدك وربنا يكرمك انك وضحت لنا اما موضوع غيابك فانا اتعودت استنى تعليقاتك على كل موضوعاتى واستغربت جدا ان الموضوع بقاله فتره وما علقتش عليه وسؤالى ما يستحقش ابدا الشكر دا ابسط حاجه ممكن نقدمها لكرم اخلاقك وفعلا انت قلقتنا عليك ياريت تطمنا ويكون الموضوع بسيط وربنا يهون عليك وترجع لنا بالسلامه كعهدنا بيك ديما مشرق وسعيد تحياتى

    ReplyDelete
  6. قبل ما أقرا البوست أحب أعلق بس على الشيء اللي لفت نظري وجابني هنا

    وهو إعجابي باللمسات الفنية في المدونة إبتداء من :

    صورة البروفايل
    وده اللي جابني أساساً
    وشغل الفوتو شوب اللي فيها

    إلى تصميم المدونة الهادئ
    وتناسق الألوان بها
    والإختيار الرائع للصور

    وبمروري سريعاً على المحتوى التدويني لاحظت أنه قيم وفيه ثراء فكري

    حأقرا البوست بقى

    تحياتي

    ReplyDelete
  7. إيه البوست إتغير ولا إيه؟؟؟؟؟؟؟؟:)

    على العموم هى فعلا لو إحنا إستغلينا

    الأزمه دى يبقى إحنا هنكسب كتير أوى

    ده لو عرفنا !!!!!!!!!بس ربنا معانا

    ونعرف نغتنمها........بالنسبه

    لإعتزال حضرتك فده مش ينفع يعنى إيه

    حضرتك تعتزل؟؟؟؟؟بس كويس إن حضرتك

    شلت الفكرة من دماغك وياريت ماترجعش

    تانى ماشى يا أستاذ تامر.......:)


    "سندس"

    ReplyDelete
  8. This comment has been removed by the author.

    ReplyDelete
  9. سلامو عليكم
    الموضوع مهم جدا طبعا بس عايز اقول انه وصلني بصورة مختلفة وده اللىى اتأكدت منه
    الازمة كان سببها رهن الرهن
    الناس كانت بتاخد قرض بضمان البيت البيت تمنه ربع مليون يبقى القرض 200 الف دولار مثلاً .. وبعدين ياخدوا قرض تاني بضمان ال200 الف دولار ممكن يوصل ل160 مثلاً وعند عمل ازمة جدا عند السداد لان الناس لعتبها صح بس دلوقتي مش لاقيين بيوت يقعدوا فيها !!
    بالنسبة لخطر الاقتصاد المصر فحابب أعرف الناس ان النظام الاقتصادي المصري من افضل الانظمة الاقتصادية فعلاً بس لو الكبار يخلعوا ايدهم منه
    مصر واحده من دلوتين في الشرق الاوسط بتضمن حرية الايضاع بضمان املاك الدولة .. يعني الفلوس في مصر آمنة جدًا وده المناخ المناسب للاستثمار
    لو اتكلمت مش هخلص..
    بتمنى يدوم التواصل

    ReplyDelete
  10. تحليل جامد جدا
    كالعادة في مفاجئات وراء شخصيتك كدة

    علي فكرة يا جماعة انا اعرف تامر عن قرب وتامر فاز بلقب اكتر واحد الناس نفسها تعرف عنه

    بسبب انه انسان تحس انه عنده خلفية كبيرة قوي ومعلوماته في كل المجالات

    واكتر شيء بيعجبني فيه اسلوبه
    تحسه انه راقي ومحترم وشيك قوي في تعاملاته

    عايزه اشكره علي المدونة الجميلة الاي عرفت عنها في الفيس بوك
    واتمني تبقي من نجاح لنجاح يا ريس

    مش عارفة الناس هنا عارفة انك عايز تبقي رئيس الجمهورية ولا لا

    نحن ورائك يا زعيم

    انا مش هكتب اسمي انا عارفة انك عرفتني

    ReplyDelete
  11. السلام عليكم ورحمة الله وبركاته
    شرفني مرورك بمدونتي
    علي الرغم من حزنه

    اما بالنسبة للبوست الاكثر من رائع فهو افادني بمعلومات كتير مش كنت بفكر فيها كده

    وكمان اول مرة اقرا بوست طويل من غير ماأفوت سطر علشان اجيب الخلاصة

    جزاك الله خيرا عنه
    وياريت يتكرر الانواع دي

    تحياتي
    الي اللقاء

    ReplyDelete
  12. الصديق تامر
    اولا اشكر لك تشريفك مدونتي بالزيارة و التعليق
    ثانيا حكاية ماجستير او دوكتوراه دي دعابة ليس الا وباستغرب ان ناس كتير واخدة علي خاطرها فاحب اعتذرعن ذلك
    ثالثا استفدت جدا من التحليل الذي كتبته للمشكلة لدرجة اني طبعته علشان اذاكره و اشرحه للي مش فاهم
    راعا ارجو دوام التواصل
    خامسا تحياتي

    ReplyDelete
  13. بجد اسلوبك حلو جدا فى الشرح و اى حد ممكن يفهمه
    و فعلا ازمة الاقتصاد مشكلتها ان كل منحنى بيمثل اى علاقة اقتصادية أى تغير فيه بيأثر على باقى المنحنيات بإختلاف الإحداثيات ....
    و فعلا من فترة حوالى سنة كدة تقريبا كان فى تغيرات اقتصادية غريبة و اول حاجة بدأت تلفت الأنظار ليها هى الإرتفاع المفاجىء ثم الهبوط الغير متوقع فى بورصة الذهب و تبعه طبعا ارتفاع الأسعار على المستوى العالمى و اللى فى ناس كتير فى مصر مقدرتش تفهم ان دى ازمة عالمية ...
    و رائحة الكساد بدأت دلوقتى تدخل إلى رئة الاقتصاد و الكل بيسأل يا ترى بعد الكساد ده حيكون فى ايه بالذات زى ما انت قلت فى ظل التضخم اللى مصر بتعانى منه يعنى بإختصار الفلوس اللى ملهاش قيمة أصلا من دلوقتى مطالبة انها تسد احتياجاتنا من منتجات أسعارها فى الطالع و ربنا يستر علينا و على الأجيال المنكوبة اللى حتبدأ حياتها فى ازمة ما يعلم بيها إلا ربنا
    إلا لو مصر قررت لمرة واحدة تتخذ قرار صح اقتصاديا و فى الوقت المناسب و بمحددات و معايير ذات أثر إيجابى ....


    اعذرنى يا تارم على تأخرى فى التواجد بس انت الحمد لله زرت مدونتى و عارف ان فى عندى شوية ظروف منعتنى من التواجد على النت إلى جانب العامل النفسى و المود طبعا

    بس طمنا عليك بقى
    لو مفيهاش غلاسة يعنى ايه الظروف اللى كانت حتبعدك عننا بقى ؟؟
    و ان شاء الله يكون خير بس متفكرش انك تسيبنا ابدا ابدا
    انا بقولك اهو

    ReplyDelete
  14. عزيزتي ايمي
    اشكرك علي تعليقك الجميل وسعيد
    ان السلوب كان بسيط ووصل ليكي
    واشكرك علي كلامك الجميل

    اما عن سؤالك
    طب وياترى قلة السيولة ده بيحصل نتيجة جشع البنوك فى استغلال كل الفلوس ام انه عدم تخطيط للموقف المالى بشكل جيد ؟

    بصي يا يامي
    هي البنوك بتبقي في موقف صعب في الحالتين
    اما انها تستثمر الفلوس كلها وتبقي في وضع خطر ونقص السيولة
    او تسيب السيولة في البنك
    وبكدة تبقي فشلت في استثمار الفلوس

    يعني الوضعين اصعب من بعض
    علشان كدة بيبقي في نسب امان البنوك بتحاول مش تتخطاها
    وده الاي مش عملته البنوك الامريكية لانها قللت النسبة علشان تشجع الاستثمار

    اشكرك يا عزيزتي واتمني ليكي متابعة مستمرة للمدونة

    تحياتي

    ReplyDelete
  15. اخي العزيز رومنسي
    سعيد ان البوست عجبك
    وانك فهمت منه الازمة المالية عبارة عن ايه
    اما عن غيابي
    في دي بس شوية ظروف مؤقتة واكيد الانسان في حياته بيحاول يتخطي اي الام
    ويكمل طريقه

    تحياتي
    تامر

    ReplyDelete
  16. عزيزي محمد غالي

    سعيد بزيارتك الاولي للمدونة
    والحمد لله في التحديث رقم 1
    باين ان في اتجاه لخطوات ايجابية لتكامل عربي كحل للازمة
    اتمني مش يبقي كلام وخلاص ويبقي عمل جاد


    تحياتي

    ReplyDelete
  17. عزيزي
    البحث عن انا شيء جنوني

    انا سعيد جدا بالتعليق بتاعك لانها شهادة من حد فاهم اقتصاد
    وفاهم قد ايه الازمة خطيرة
    عندك حق في كل ما قلت

    شركو اوراسكم مثلا وصلت خسايرها لميار جنيه وانها اشترت ب 80 مليون قيمة اسهم عشان تحافظ على سعر السهم

    علي فكرة دي حاجة خطيرة جدا
    انا ملاحظها فعلا
    وعلي فكرة دي بداية لمشكلة جديدة
    زي فضيحة انرون للطالقة في اميركا
    والشركة الكبيرة دي الاي انهارت
    علشان التقارير المحاسبية الملفقة
    وشراء الشركة لاسهمها لرفع قيمتها في السوق

    تحياتي علي تحليلك الجميل واهلا بيك في اي وقت في المدونة

    تحياتي
    تامر الحسيني انسان عاشق حر

    ReplyDelete
  18. عزيزتي طوبة فضة وطوبة دهب

    اشكرك علي تعليقك الجميل
    والاي بجد اسعدني
    خاصة اني قدرت انقل ليكي
    وجهة نظر اقتصادية
    بشكل مبسط


    انا فعلا ما اتعودتش اقرا اكتر من عناوين الاخبار والجرايد فى اخبار السياسه والاقتصاد وبالتالى بفهمش قشور المشكله بس لكن اول مره حقيقى افهم بالوضوح ده تسلم ايدك وربنا يكرمك انك وضحت لنا

    كلماتك هذه غالية جدا عندي اشكرك بحق

    اما عن موضوع الغياب
    فاشكرك لاهتمامك مرة اخري
    الحمد لله انا كويس الان
    وان شاء الله دي مرحلة في حياتي وتعدي
    ان شاء الله
    بس ان شاء الله مش هتاثر علي التدوين ان شاء الله

    تحياتي
    تامر الحسيني

    ReplyDelete
  19. عزيزي عمر صحيح انت مش اتكلمت في موضوع البوست

    لكن بجد تعليقك اسعدني جدا

    ان الناس بتاخد بالها من التفاصيل
    الصغيرة والبسيطة زي الصور والوانها وتناسقها وشكل المدونة
    وشكل البانر وتجديدة باستمرار
    وتناسق الالوان

    الحجات دي بجد انا حريص عليها جدا جدا
    لدرجة ان المدونة بتعتي
    اطريت اعمل ليها اكواد خاصة علشان تظهر كئنها معمولة علي بلوج سبوت
    ومن قوالبه مع انها معمولة بكود تاني حاولت اني اوصل بيه للشكل الاي بحلم بيه

    والحمد لله انها بتلاقي استحثانك دلوقتي وده المكسب بجد

    تحياتي
    تامر الحسيني

    ReplyDelete
  20. كنت فاهمة انى عارفة كل تفاصيل الازمة بس طلعت فى حاجات معديه من تحت ايدى , احسنت اختيار الموضوع واحسنت العرض

    ReplyDelete
  21. في ناحيه الاقتصاد الغباء بيكون مستحكم


    مع اني في ثانوي جيبه في الفول مارك

    لما شفت البوست حسيت بتوهان

    فجري رحت لماما عشان هي ادراره اعمال واكيد فاهمه

    فضل ساعه يبني والغباء متمكن مني ياحيني عليا

    بس احب اطمنك اني اخيرا فهمت

    ReplyDelete
  22. اهلا يا تامر بيك
    عامل ايه بعد الحفله الجميله امبارح
    يارب تكون نمت كويس
    دى بقى يا تامر بيسموها تنبؤات رجال الاقتصاد
    يارب دايما كده يا تامر فى خير وسلام
    دايما يارب

    ReplyDelete
  23. بجد اعتزر عن التأخير

    ولكنى قرأت الموضوع اكثر من مرة

    واعجبنى اسلوبك السلسل فى التحليل وهذا شئ

    عادى منك لأنك متمكن من ذلك فى دراستك

    واعلم انك تستطيع التحليل بصورة رائعة
    وزاد اعجابى طريقة توصيلك للمعلومة التى اعطت الجميع القدرة على التعرف على الوضع الحالى للأزمة
    وكيف يمكننا ان نساعد
    من يحاولون المرور باقتصادنا بسلام من تلك الأزمة
    وان تلك السيطرة المزعومة للأم الكبرى لم يعد لها وجود
    واكد تحليك ما نشر اليوم
    وقمت بتعديلة

    وهذا دليل على اننا ان لم نجتمع سابقا فلابد ان نجتمع ونتحد حاليا
    وفقك الله وزادك خبرة فى مجالك
    لعلنا نسمع عن محلل اقتصادى رائع قؤيبا

    أتمنى لك التوفيق

    smilyrose

    روح الحب الصادق

    ReplyDelete
  24. استاذى العزيز المدونه يطفو عليها جو من الحزن عام ونحن لم نعتاد على ذلك منك من حقك ان تحزن فان القلب ليحزن وان العين لتدمع وهذا كلام رسولنا الكريم ولكنك من قلت لى من قبل ان الاوهام اشباح وايضا الحزن اكبر شبح ممكن ان يسرق منا الزمن فتغلب على احزانك وعد لنا كعهدنا بك مشرق منير فنحن فى انتظارك وحاول ان تتكلم فالكلام خير وسيله لتفريغ الاحزان ولا تقتصر الحزن على نفسك فيتكابد ويتزايد عليك وحدك وشديده الاسف على تطفلى وتدخلى فى شئونك ولكن لا استطيع ان ارى امرا ولا اتكلم تحياتى لك وفى انتظارك كما عودتنا

    ReplyDelete
  25. عزيزتي سندس
    سعيد قوي بزيارتك للمدونة من جديد
    فعلا البوست اتغير
    لان في اوقات الانسان بيبقي صعب عليه يتكلم عن شيء هو مفتقده في حياته
    حتي لو قادر يوصله بجمال

    اما عن الازمة العالمية
    فسعيد باهتمامك واتمني ان الناس تحس باهمية الاقتصاد
    لانه بجد اكتر شيء بياثر فينا
    حتي احنا يا شعب لما بنيجي ننتقد الحكومة الاي هي سياسة بنقول في الغلاء
    الاي هو اقتصاد

    اما عن الاعتزال
    انا مش فكرت قبل كدة في الاعتزال
    انا قبل كدة لاغيت مدونتي بالكامل بكل موضوعتها بارشيفها
    الاي كان كبير
    بس برضه محستش اني عايز اعتزل فكرت بس اني ابعد شوية صغيرة
    وان شاء الله لا يكون في بعد ولا حاجة

    تحياتي
    تامر الحسيني

    ReplyDelete
  26. عزيزي كوارث بجد سعيد باضافتك
    الجميلة
    فعلا

    الناس كانت بتاخد قرض بضمان البيت البيت تمنه ربع مليون يبقى القرض 200 الف دولار مثلاً .. وبعدين ياخدوا قرض تاني بضمان ال200 الف دولار ممكن يوصل ل160 مثلاً وعند عمل ازمة جدا عند السداد لان الناس لعتبها صح بس دلوقتي مش لاقيين بيوت يقعدوا فيها !!

    انا متفق معك جدا في ذلك
    هما فعلا مش لاقيين بس مش بيوت
    هما مش لاقيين فلوس
    اما عن البيوت فا في تقريبا
    مناطق كاملة في امرؤيكا دلوقتي منغير سكان بسبب
    عدم قدرت الناس علي دفع الفلوس

    تحياتي ليك يا كوارث وسعيد جدا باضافتك

    تحياتي

    ReplyDelete
  27. Anonymous عزيزي

    انا تقريبا كدة عرفت انت مين
    وسعيد جدا بزيارتك للمدونة
    وفاكر الايام الجميلة الاي جمعتنا سوا
    هههههههههههههههههه

    بس انا مش عارف مين بالضبط
    من التيم بتعنا كاتب التعليق
    بس بشكرك جدا علي دخولك ده وكلماتك الجميلة

    تحياتي
    رئيس الجمهورية
    تامر الحسيني

    ReplyDelete
  28. عزيزتي kemet
    اشكرك علي زيارتك للمدونة وسعيد جدا
    ان البوست ونوعيته عجبوكي
    اما عن تعليقي في مدونتك
    فا في الحقيقة انا كتبت تعليق طويل
    وفي الاخر بصراحة لم استطع نشره
    لان موضوعك الجميل قد يدفع الانسان لانه يقول بجد الاي جواه ويعبر عن احزانه

    تحياتي ليكي
    واتمني مش تكون دي اخر زيارة بين مدونتنا

    تحياتي
    تامر الحسيني

    ReplyDelete
  29. الاستاذ العزيز
    طارق

    اهلا وسهلا بحضرتك وسعيد بتشريفك المدونة فعلا
    وثقتك في تحيلي التي لم اتصورها
    واسعدتني للغاية
    اما عن موضوع الماجيستير والدكتوراه
    انا ادركت كدة علي فكرة بس حبيت اني برضه اقول خلفيتي العلمية علشان يبقي في ثقة اكثر في التحليل
    وده اسعدني جدا

    انا كنت جالس في مكان عام وسمعت حوار بين رجل وزوجته
    كان يسئلها بتعجب
    اذاي البنوك تفلس؟
    هي البنوك مش الاي بيبقي فيها فلوس؟
    الفلوس راحت فين؟

    طبعا انا كنت عايز اشرح له النقطة دي
    بس بصراحة ادب الحوار منعني من اني اتدخل
    في حوارهم ده
    علشان كدة فكرت اني اكتب البوست علشان لو حد عغايبة عنه نقطة لان مجاله بعيد عن الموضوع
    ياخد فكرة لان الموضوع مش موضوع يهم بس المشتغلين في المال والاقتصاد

    لا الاقتصاد بيمس كل مواطن
    وفي مجتمعنا الحقيقة دي غايبة جدا
    لدرجة ان في الغرب المواطن بيبص علي البورصة قبل ما يفكر يشتغل ايه
    علشان يعرف هيلاقي شغل ولا لا
    وهيعرف بكرة ياكل ولا هيموت من الجوع


    تحياتي
    لحضرتك وسعيد جدا بتشريفك للمدونة

    تامر الحسيني

    ReplyDelete
  30. الاخت العزيزة
    عازفة الاوتار

    طبعا كان واضح ان الرومنسية والاحساس المرهف والحس الفني العالي
    كل ده بيخفي ورائه حد بيفهم قوي في الاقتصاد
    صدقيني تحليلك فني جدا مش بيخرج غير من حد فاهم قوي في الاقتصاد ودارسه كمان اكاديميا
    دي اللغة الاي كنت اتمني اشرح بيها البوست
    بس محدش كان هيفهمني بيه
    بس سعيد قوي انك في تعليقك وصلتي للتحليل بالشكل ده

    تحياتي

    --------------------------
    بس طمنا عليك بقى
    لو مفيهاش غلاسة يعنى ايه الظروف اللى كانت حتبعدك عننا بقى ؟؟
    و ان شاء الله يكون خير بس متفكرش انك تسيبنا ابدا ابدا
    انا بقولك اهو

    كلامك ده غالي عندي جدا بشكل لا تتصوريه
    لاني انا كمان مش اقدر ابعد عن التدوين وعن الناس الاي بحب اقرء لهم واحب اوصل لوجهة نظرهم واستمتع بموضوعتهم الاي كلها رقة وجمال
    زي موضوعاتك وزي موضوعات كل المدونين الاي بحبهم وبحب اتابعهم

    اما عن اجابة السؤال
    ايه الظروف
    فده شيء بصراحة صعب اقوله
    لانه مش من طباعي اني اصرح بمشاعري بشكل كامل
    ممكن اعبر عنها بصورة او كلمة حزينة
    بس مش بقولها بشكل كامل غير نادرا جدا

    تحياتي ليكي ولاهتمامك
    ويارب دائما تنوري علطول المدونة عندي
    وحمدلة علي سلامة رجوعك للتدوين من جديد

    تحياتي
    تامر الحسيني

    ReplyDelete
  31. عزيزتي زي الهوا

    ههههههههههههههههه
    انا طبعا سعيد ان دلوقتي مش بقت في حاجة معدية من تحت ايدك
    بعد ما قراتي البوست
    وسعيد جدا اني قدمت اضافة ولو صغيرة ليكي

    واشكرك علي كلماتك الجميلة

    وحلو قوي مصطلح
    حاجات معديه من تحت ايدى

    ابتسمت اول ما شفته وتصورت ازمة السيولة بتتحرك كدة تحت ايدك
    ههههههههههههههههههههههه

    تحياتي ليكي
    تامر الحسيني

    ReplyDelete
  32. ههههههههههههههههههههههه
    طبعا عارفين الاضحكة دي سببها مين
    اكيد كيارا طبعا

    اشكرك علي تعليقك الجميل
    ههههههههههههههههه
    انتي تعبتي ماما معاكي كدة

    بس احب اطمنك الازمة المالية مش هتاثر علي قطاع تصنيع المصاصت
    ان شاء الله

    ولو اثرت
    قولي لي وانا اجيب ليكي اكبر مصاصة في العالم تاني

    صحيح انتي عملتي ايه في الاولانية

    هانت ولا لسة مش خلصتيها؟

    تحياتي
    وسعيد انك فهمتي في الاخر
    وتحياتي لماما ومجهودها الكبير
    هههههههههههههههه

    تامر الحسيني

    ReplyDelete
  33. اخي العزيز احمد
    اشكرك بجد علي تعليقك وبصراحة مش نمت كويس
    بسبب القلق
    اما عن الحفلة ان شاء الله اول ما الظروف الاي عندي تعدي
    هعلن خبرها في المدونة
    وهتبقي مفاجئة كبيرة
    ولطيفة ان شاء الله

    تحياتي
    تامر اخوك

    ReplyDelete
  34. عزيزتي
    smilyrose

    سماح المرة دي علشان اول مرة تتاخري في الرد

    كمان اشكرك علي تعليقك ووجهة نظرك الصائبة
    واتمني فعلا التكامل يكون الحل فعلا
    وان شاء الله
    اشكرك علي مجاملتك اللطيفة
    لما قلتي
    لعلنا نسمع عن محلل اقتصادى رائع قؤيبا
    ولو ان قريبا كدة مش كدة
    قؤيبا
    هههههههههههههههههههههههه

    الله يخليكي واشكرك علي ثقتك دي
    الاي بحث انها كتير قوي علية

    تحياتي

    ReplyDelete
  35. لقد قرئته جيدا واستوعبت منه كتي علي اللي سمعته من الاعلام بكل انواعه
    يعني اه الواحد بقه في الصوره
    لو ان رئيس الوزرا قال كلام تاني ومصر حديد وياجبل مايهدك ريح
    بشكرك علي المجهود المبزول في التحليل

    ReplyDelete
  36. عزيزتي شمس النهار

    اشكرك علي تشريفك للمدونة وموضوعتها بجد سعيد باهتمامك ده
    واتمني الموضوعات تعجبك
    وتكون فيها ما يضيف اليكي
    وسعيد لاني حاسس من تعليقك عن الازمة المالية العالمية انك متبعاها كويس
    وشفتي حوار رئيس الوزراء
    هو فعلا كان خلاص ناقص يقول يا جبل ما يهزك ريح

    للسف الحكومة لسة متصورة انها لما تدعي او تصور للناس حاجة غير حقيقية الناس هتصدق
    كئن الناس خلاص مغيبة مش عارفة الحقيقة

    الحقيقة ان كل دول العالم بلا استثماء
    قامد بمنح اعانات للمظام المالي والمصرقي
    الا مصر
    حتي دول الخلي ضخو مليارات علشان السوق مش يقف
    واحنا الحكومة واقفة تتفرج علي الخسائر الفادحة والانهيارات
    في الشركات
    وده حقيقي فعلا في شركات حقيقي بتنهار دلوقتي
    وواقفة تهتف وتهلل
    باسلوب عنتر فاشل

    تحياتي ليكي
    تامر الحسيني
    انسان عاشق حر

    ReplyDelete
  37. السلام عليكم ورحمة الله وبركاته

    شكرا علي اطراءك المبالغ فيه

    اما بجد لو كان كلام الجمهورية صحيح واتفعل صح يبقي لسه في خير
    ربنا يحقق امنيتك التاني

    حلو اوي متابعة الموضوع تحديثه لان الناس اللي زي اللي تابوا عن قراءة الجرايد او سماع الاخبار ما عادوش يعرفوا حاجه عن البلد الا لو التلفزيون مش عليه حاجة ومضطر يسمع العاشرة مساء او 90دقيقة او ما شابه

    تحياتي
    الي اللقاء

    ReplyDelete
  38. ههههههههههههههههههههههه
    طبعا عارفين الاضحكة دي سببها مين
    اكيد كيارا طبعا

    ----------

    ههههههههههههه ايه بقي الفضايح دي دي ضحكه وملعلعه كمان

    ----------
    اشكرك علي تعليقك الجميل
    ههههههههههههههههه
    انتي تعبتي ماما معاكي كدة

    ---------

    هههههههههههههههههه مش ماما بس يلا قدرهم

    -----------
    بس احب اطمنك الازمة المالية مش هتاثر علي قطاع تصنيع المصاصت
    ان شاء الله

    ------------

    هيييييييييييييييه تامصاصات مش هتتاثر

    ----------
    ولو اثرت
    قولي لي وانا اجيب ليكي اكبر مصاصة في العالم تاني

    صحيح انتي عملتي ايه في الاولانية

    هانت ولا لسة مش خلصتيها؟

    ------------

    هههههههههههههههههههه

    هانت هانت

    -----------
    تحياتي
    وسعيد انك فهمتي في الاخر
    وتحياتي لماما ومجهودها الكبير
    هههههههههههههههه

    -----------

    هههههههههههههههههه يالهوي مجهود كبير كمان

    انا اصلا نسيت اللي قالته

    كيكيكييكيكيك

    ReplyDelete
  39. فى الأول أحب أسجل لك إعجابى بشرحك المبسط للموضوع برغم أن الموضوع شائك يعنى عارف كدا

    زى الفيزيا و الكيميا بس أنت مشاء الله عليك عملت زى (المستر) الشاطر اللى بسط المعلومة بشكل

    هايل فلك خالص تحياتى

    اسمح لى بقى ان كتير من الناس مش بتهتم باللى بيحصل فى البورصة العالمية او حتى الاقتصاد

    العالمى ولا حتى يهمه البورصة انهارت ولا حتى كان الاقفال على كام والفتح على كام و أحوال البورصة

    هتبقى ازاى ؟؟
    يعنى لو قسمنا الناس للنوعين هيبقى كالاتى خد عندك يا سيدى:
    1- الناس المهتمين بالامور دى واللى هما جوا اللعبة يعنى اصحاب الشركات و الاسهم و بتوع البيزنس

    الكبار اوى ( اوعدنا يارب )

    2- النوع التانى دا بقى ( غلابة زينا الى حد ما ) بس ظروف شغلهم فرضت عليهم يكونوا جوا اللعبة

    بس بسبب الوضع الحالى ظهر نوع آخر و اعتقد انى من النوع اللى بيهتم من باب المعرفة ليس الا من

    الاخر كدا يعنى اللى مش لهم لا ناقة ولا جمل فى الليلة دى خالص ، يعنى المعرفة بشغل البنوك

    مجرد معلومات بسيطة عن قروض ، اعتمادات و مليارات و متعسرين و الخ الخ

    بس بصراحة انت وضعت تحليل هايل للوضع وكمان اعطيت رؤية موضعية للظروف واحتمالاتها ايه دا يا

    اخواتى خبير اقتصادى ( تاتش وود ههههههههههه عشان الحسد)

    عارف العجيب بقى لما العمالة المصرية الموجودة فى الدول اللى أتاثرت بالازمة هتتاثر بصورة سلبية

    هى كمان و يجى وزير التمنية و يقولك أن الحكومة حيسثمر 42 مليار جنية لمواجهة الازمة العالمية و

    كمان الدول (15 ) هيتجتمعوا كدا فى قعدة عرب يعنى و يضخوا امول لمواجهة الازمة وانعاش البورصة

    تمام والله

    لكن الاعجب بقى ان التقارير الاقتصادية بتقول ان العمالة المصرية فى الامارات او السعودية و حتى

    امريكا تحويلاتهم حتتاثر عشان تشابك اقتصاديات دول الخليج باقتصاديات امريكا يانهار ابيض واسود

    يعنى التحويلات كانت 8.6 حتنزل 6.4 من اجمالى الناتج المحلى يعنى الفرق واضح وبعدين يتكلموا كان الحكاية ولا فى اى حاجة واحنا فى التمام مش عارفة بيضحكوا علينا ولا على نفسهم الناس دى والله

    يااااااااه انا طولت عليك اوى بس اعذرنى الموضوع كبير و يستحق حواورات كتيرة وانت بصراحة كتبت

    باسلوب رائع فتحياتى و اعجابى للخبير الاقتصادى

    تحياتى
    يويو

    ReplyDelete
  40. هوه انا ممكن اسألك معلش عن حاجة فى البلوجز تانى ؟؟؟ معلش انا حاسة انى بتقل جدا عليك , بس اصلى ما بقنش اطيق ادخل على مدونتى علشان مش عارفة اجدد فيها , ممكن ؟؟ ( وش مكسوف من كتر طلباته )

    ReplyDelete
  41. تامر

    سلام عليكم

    التحديث اللى انت اضفته اثبت انك بارع فى الاقتصاد والتحليل الاقتصادى

    اما بالنسبة لردك على تعليقى اللى فات فلا شكر على واجب وزى مانت شايف انا مقدرشى اقطع متابعتى لمدونتك الا لو انت اللى رفضت انى ادخل

    تحياتى

    ايمى

    ReplyDelete
  42. اولا مكنش العشم انك تنسانى ومتسئلش علية دة كان عيش وملح وصداقة عمر مش معرفة امبارح بجد زعلان ولو تعرف كان عندى اية هتزعل من نفسك اوى بجد عموما شاكر ليك وعلى فكرة البوست دة بجد رائع ولازم يكون كدة علشان المحلل المالى تيمو هو اليى شيفة من وجهة نظرة
    تحياتى ليك
    mahgoubشخابيط

    ReplyDelete
  43. عزيزتي Kemet

    اشكرك للمتابعة يا عزيزتي
    وسعيد ان المدونة عندي بتحقق ليكي المتاعبة دي واتمني تحقق امنيتي دي لانها بجد هتبقي نقطة تحول لمصور والعرب

    تحياتي
    تامر الحسيني

    ReplyDelete
  44. عزيزتي كيارا

    طبعا انا بشكرك علي متابعتك للمدونة
    بجد انتي مميزة جدا في اسلوبك
    علشان كدة
    انا قلت عارفين الضحكة دي بتاع مين

    عارفة انا دخلت المدونة وكنت متضايق قوي وقرات تعليقك فيها ابتسمت بجد

    لما قرائته
    وفي حديث عن الرسول فيما معناه

    من اضحك وجه اخيه المسلم له بها صدقة

    انا مش عارف نص الحديث بالضبط للاسف

    تحياتي ليكي واشكرك علي جو المرح والبهجة الاي بتضيفيه لاي مكان تدخليه

    تحياتي
    تامر الحسيني

    ReplyDelete
  45. عزيزتي يويو

    اهلا وسهلا بيكي في المدونة
    والله المدونة منورة بتعليقاتك الجميلة باستمرار

    اما عن انواع الناس المهتمة بالاقتصاد
    فطبعا انا قلت قبل كدة بره
    في العالم الغربي
    كل الناس بتعرف اقتصاد لان كل الناس حريصة انها تاخد قرارات صح في حياتها

    تبدا تدخل امتي وتصرف فلوسها امتي وتشتري امتي
    وتشتغل امتي
    كل الحجات دي واكثر بتقدر تكتشفها بقليل من الفهم للاقتصاد
    واتمني اني اقدر اساهم في الفهم ده

    اما بقي
    خبير اقتصادى ( تاتش وود ههههههههههه عشان الحسد)
    احب اشكرك علي الكومبليو ده
    انا واحد عادي دارس اقتصاد وقدرت اوصل لوجهة النظر دي من خلال مؤشرات كتير

    حتي انتي قدرتي توصلي لحاجة مهمة
    لما قلتي عن تحويلات المصريين للخارج

    علي فكرة بجد موارد مصر من النقد الاجنبي هي ببساطة

    1- قناة السويس
    2- البترول
    3- تحويلات المصريين من الخارج
    4- السياحة
    5- الصادرات الزراعية والنسجية والمواد الخام

    بس دول
    هما مصادر مصر من العملات الاجنبية
    وكل دول هيتاثروا بالازمة للاسف
    لان مش فيهم حاجة محترمة
    كلهم حجات جاية بالصدفة ومش في انتاج حقيقي

    تحياتي ليكي ونورتي المدونة من جديد
    تحياتي

    تامر الحسيني انسان عاشق حر

    ReplyDelete
  46. الاخت العزيزة
    زي الهوا

    انا اسف جدا علي التاخير انا مش دخلت المدونة من فترة
    ولما دخلت ولاقيت طلبك ده
    زعلت جدا اني مش قدرت ادخل واشوفه في وقته علشان ارد عليه علطول

    وطبعا انا يسعدني اساعدك باي شيء تطلبيه
    وباي وسيلة تختاريها للاتصال بينا والمساعدة

    وانا تحت امرك وتحت امر اي حد يطلب مساعدة في اي شيء

    قال رسول الله صلي الله عليه وسلم
    من حرم فضل مائه حرمه الله فضله
    صدق رسول الله صلي الله عليه وسلم

    تحياتي ليكي وفي انتظار اي طلب منك ويارب اقدر اعمله بشكل كويس
    ويعجبك

    تحياتي
    تامر الحسيني
    انسان عاشق حر

    ReplyDelete
  47. الاخت العزيزة ايمي

    اشكرك علي تعليقك ومتابعتك
    واشكرك علي زوقك وثقتك في تحليلي ده
    والحمد لله انه اثبت صحته المهم يتنفز علشان يبقي له قيمة اصلا

    اما عن متابعتك للمدونة والتعليق
    فالمدونة طبعا مدونتك
    ودائما تعليقك فيها شيء بيسعدني
    لان تعليقاتك كلها ليها مضمون كويس وفكر
    مش مجرد تعليق



    تحياتي

    تامر الحسيني
    انسان عاشق حر

    ReplyDelete
  48. اخي العزيز محجوب

    انا اسف يا صديقي
    انا عارف ان اني مقصر جدا وعارف ان الموبايل بتاعي دائما مقفول وصدقني انا اسف جدا وعلي فكرة انا اتصلت بالفعل بيك لما لاقيتك اتاخرت ومش بترد علي تعليقات الناس في البوست الاخير
    بس الموبايل مكنش متاح
    وانا الظروف للاسف الاي بمر بيها اخدتني شوية

    تحياتي
    وتقبل اعتزاري وسعيد ان البوست عجبك وارجو انك مش تزعل مني

    تامر الحسيني
    اخوك

    ReplyDelete
  49. بجدد دى اول مرة اقرا موضوع عن الاقتصاد
    اسلوبك بسيط جدا ماشاء الله
    بالتوفيق دائما

    ReplyDelete
  50. اولا احب اعتذر جدا جدا جدا
    عن عدم دخولى المدونه طول الفتره دى
    بس ظروف
    انا عارفه ان قلبك كبير وحتسامحنى
    لكن حضرتك عارف ان حتى مدونتى اللى بدأتها من حوالى سنه مش كتبت فيها موضوعات

    المهم
    ادخل بقى فى التحليل الاقتصادى الهايل ده
    من حوالى شويه صغيرين كنت بسمع برنامج اوبرالانى مكنتش فاهمه حاجه من المصطلحات الضخمه اللى المحللين فى البرامج الاخباريه بيحاولوا يفسروا بيها الازمه
    قلت يمكن افهم شويه من اوبرا
    وفعلا فهمت كتير عن ازمه تمويل البنوك للمواطنين هناك قروض للبيوت وللسيارات وخلافه
    لكن موضوعك ده زاد من وضوح الفكره
    وخصوصا تحليلك ان العالم العربى حيكون ليه استفاده كبيره جدا من الازمه دى

    اشكر ليك اسلوبك المبسط
    وارجو المعذره عن الاطاله
    وايضا المعذره للغياب الطويل

    واخيرا لى استفسار بعد ما قريت التعليقات حسيت انى فاتنى موضوع بعد موضوع المظله
    اعتقد موضوع بخصوص اعتزال التدوين
    طبعا وبدون انى مجاملات حضرتك شايف اد ايه مدونين كتير اوى بيحبوا مدونتك وبيحبوا ثرائك الفكرى وتنوع موضوعاتك
    فأعتقد ان شخص الناس بتحبه بالطريقه دى ميوجعهمش ببعده عنهم
    دى اكيد حاجه مترضيش حد


    واكيد انا مش غلطانه
    ارجو ان حضرتك تلغى الفكره دى ولا تجعل الظروف هى المتحكمه

    تحياتى ليك جدا
    ضى القمر
    كلاكيت أول مره

    ReplyDelete
  51. و الله ماشاء الله عليك
    مثقف و كمان بتعرف توصل المعلومه صح
    بس رعبتنى و الله
    ربنا يستر احنا مش ناقصين

    ReplyDelete
  52. متشكرة جدا , بس ما تأخرتش ولا حاجة , عادى انا مش بدخا كتير اوى

    بص الموقع دا :


    http://photobucket.com/images/template%20for%20blog/?page=2&userinit=true&source=header


    فيه تمبلاتس روعة بس مش عارفة اعملها خالص فى ماى بلوج, ومواقع كتير زيه كدة بس العيب فبا انا اعمل ايه , لو قولتى الخطوات واحد اتنين هتلاقينى بعملها بالظبط لأنى تلميذة نجيبة والله

    ReplyDelete
  53. مشكلتى فى تدويناتك انها بتفوق قدراتى الذهنية
    بفصل فى نص البوست
    هههههههههه
    بس منكرش انى فهمت حاجات كتير اوى مكنتش فاهماها زى سبب الازمة وازاى احنا اتاثرنا بيها
    هقرا تانى واتعمق اكتر
    غبا بعيد عنك
    هههههههههه
    تحياتى

    ReplyDelete
  54. عزيزتي موناليزا

    سعيد قوي ان الموضوع عجبك واتمني ان شاء الله
    انك تلاقي دائما ما يعجبك هنا

    وسعيد انك بتقرئي اقتصاد لاول مرة واتمني تكون دي بداية
    لانه بجد علم هام جدا

    تحياتي
    تامر الحسيني

    ReplyDelete
  55. عزيزتي ضي القمر

    اهلا بيكي بجد المدونة عندي مفتقداكي جدا

    مدونتك مش عملتي فيها موضوعات من سبع شهور كاملة
    وناس كتير ممكن تفتكرك المدونة ضي القمر
    هو في اتنين من المدونين اسمهم ضي القمر
    دي بقي ضي القمر الاي كلمتكم عنها
    الاي علطول كانت بتشارك عندي في مدونتي بالتعليق واوقات كتير قوي مكنش بيسبقي في تعليقات خالص غير تعليقها علي موضوعات هامة جدا في مدونتي

    اهلا بيكي يا ضي القمر من جديد واتمني ميتبعش الرجوع ده توقف جديد

    تامر الحسيني

    ReplyDelete
  56. عزيزتي
    الجواز وسنينه

    طبعا انتي جواز واتجوزتي
    وموضوعات في الاقتصاد
    وقريتي
    ورعب من المستقبل واترعبتي

    ههههههههههههههههه

    تامر الحسيني
    واحد مش بيحشر مناخيره في الاي ملهوش فيه

    ReplyDelete
  57. الاخت العزيزة

    زي الهواااااا

    انا دخلت علي اللينك الاي بعتيه ليه بس ده مش تمبلت دي صور تنفع تبقي خلفية
    يعني صور علشان تعدلي بيها تمبلت موجود

    وده هيحتاج منك تبقي عارفة في تعديل لغة
    html & Css
    انا جبت ليكي فيدو يشرح العملية دي
    ياريت تسمعيهم بتركيز وهتستفيدي منهم اكيد ان شاء الله

    ولو مش وصلتي لحاجة قولي لي
    وانا هساعدك بشكل مختلف

    http://www.youtube.com/watch?v=5_k_PvV5gAM

    http://www.youtube.com/watch?v=-WLtIhOrEuo&feature=related

    http://www.youtube.com/watch?v=0g7ESTryrlg&feature=related

    تامر الحسيني

    ReplyDelete
  58. عزيزتي اية
    حمدلة علي السلامة من جديد
    واسمحي لي اني اقول لكل زواري انك رجعتي بالسلامة وفي نقطة تحول كبيرة الفترة الجاية

    واتمني ليكي يارب التوفيق

    اما بقي عن مشكلتك مع موضوعاتي
    انا كنت اتمني الشرح يبقي مبسط قوي المرة دي بس الحمد لله انك فهمتي
    واقرئي تاني
    والتكرؤار بيفيد الشطار

    تحياتي واهلا بيكي من جديد في المدونة

    تامر الحسيني

    ReplyDelete
  59. اعزائي المدونين

    بشكركم بجد علي تعليقاتكم الجميلة
    وكمان سعيد ان بعضكم قراء في الاقتصاد للمرة الاولي
    وسعيد ان وجهة النظر الاي عرضتها اسهمت في تعميق الموضوع للناس المتابعة له في الاساس

    اما عن التحديثات فاوعدكم ان التحديثات هتفضل علي الموضوع ده

    وان شاء الله يبقي في معرفة مننا كلنا بالاقتصاد واهميته وتاثيره علي حياتنا

    تحياتي
    تامر الحسيني

    ReplyDelete
  60. الدنيا نورت فى دماغى شوية كويسين

    لانى مكنتش متخيلة ان القوة العظمى فى العالم اقتصادها بينهار

    بس باللى فهمته من كلامك

    ان ممكن الموضوع يتقلب(مصائب قوم عند قوم فوائده)

    و ازمة البطالة اللى اتنكدنا عشانها سنين ممكن تتحل فى غمضة عين

    انا هتمسك بتفاؤلى حتى النهاية

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد