Saturday, May 24, 2008

حسيت بحاجه؟

حسيت بحاجه؟
ده السؤال الرئيسي الاي طرح في اوساط الشارع المصري وفي المدونات وعلي الفيس بوك
وفي كل مكان كل واحد بيسئل حسيت بحاجه ده طبعا يوم 5 مايو بعد خيبة 4 مايو التقيله
لكن سبحان الله كل الاي كان بيسئل بقا بقدرة قادر منغير ميتسئل بيجاوب
الشعب كله حس باجدع واقيم واحلي اقفا في تاريخه المعاصر
ولان الشعب خلاص بقا مدمن ضرب علي القفا مباقش يفرق معاه
ولانه شعب طيب وغلبان وابن نكته انتشرت كالنار في الهشيم نكته جميله وعجيبه قوي
بتقول "مره حاكم مصر حب يختبر حب الشعب ليه قرر ان كل مواطن وهو معدي الصبح علي كبري قصر النيل يدفع رسم مرور جنيه بس توقع ان الشعب هيرفض ولان الشعب بيحبه الشعب دفع بهدوء عجيب خلي الحاكم يشك فقرر انه يفرض عليهم رسم مرور قلم علي القفا وهنا بدائت تنتشر الهمهمات بين الشعب فقرر الحاكم ينزل بنفسه يشوف الشعب بيقول ايه لاقي الناس معترضه ومتضايقه قوي وبتقول طالما مش هنعدى غير لما ننضرب على قفانا ليه مبيوفروش ناس كفايه تضرب علشان نخلص"حلوه صح طبعا بتقولو الحمد لله مش بنعدي في طريقنا علي كوبري قصر النيل ودي بقا الخيبه التقيله
وعلشان النكته دي انا قررت ان مفيش داعي اتكلم عن القفا ده واوفر كلامي لاقفا تاني من الاي نازلين يرفوا علي الشعب الغلبان لكن صراحه ان القفا الاولاني الشعب اخده يوم 4 مايو الساعه 10 مساء
ولذلك حكمه مفادها ان الاضراب خلص والشعب يضرب بقا دماغه في الحيطه
مين بقا صاحب اليد الكريمه الاي اعلن عن خطة الحكومه لتوفير نسبة ال30% السحريه
هو رجل مصر الجديد احمد عز الرجل ده بجد يا جماعه ايده يامه ادت الشعب بالقفا لدرجة اني بحسده علي قوة ايده بسميه الرجل صاحب اليد الحديديه بجد بما انه بتاع حديد
واحمد عز كما يعرفه ويكيبيديا، الموسوعة الحرة هو رجل أعمال مصري رئيس مجموعات شركات العز الصناعية والتي تضم شركة العز الدخيلة للصلب وهو أيضا أمين التنظيم وعضو لجنة السياسات في الحزب الوطني الديمقراطي الحزب الحاكم في مصر وقام بتمويل حملة الرئيس حسني مبارك الانتخابية كما يرأس أيضا جمعية جيل المستقبل المقربة من جمال مبارك نجل الرئيس المصري يظن انه واجهة فقط
لثروة آل مبارك وتنتج مجموعة شركات الصلب التي يرأسها نحو ثلاثة أرباع إنتاج مصر من الصلب
وطبعا الكلام واضح قوي ويفسر بشكل جميل سر ارتفاع الحديد من 2000 جنيه الي 8000 جنيه للطن في عام واحد
والاجمل كمان هو تفسير احمد عز نفسه عن ارتفاع اسعار الحديد في مجلس الشعب حيث قال في استجواب له ان سعر طن العدس 10000 جنيه وده العدس الاي الناس بتاكله وبترمي الباقي مش عايزين سعر طن الحديد يبقا بدل 10000 يبقا 12000 جنيه
متستغربوش من البجاحه بتاعته في مجلس الشعب فالسيد احمد عز هو المسؤل الذي منع الصحفيين من التصوير في مجلس الشعب نهائيا
بعد ما تم تصويره قاعد ياكل لب وسوداني في مجلس الشعب الاي بتدار فيه بلدنا المباركه
بس مش هنخفي ان احمد عز هو السبب في الواجهه الاعلاميه الجديده للحزب الوطني
وعلي طريقة اغنيات روبي بيقوم المخرج شريف صبري بعد ما نزل روبي من علي العجله بيطلع دلوقتي العمه فوق دماغ الشعب
وعمال يخرج كليبات مصر بتتقدم بينا الاي بقت شعار الحزب الوطمني الديمقراطي والاي كلها تزييف للحقيقه
وده مش غريب علي شخص زيه بيعرف اذاي يزيف الحقائق مقابل اموال احمد عز
وبكده تبقا الصوره واضحه بالنسبه لينا وسعر الحديد المستورد في السوق الان 4000 جنيه وطبعا محتكر استيراد الحديد
هو برضه محتكر انتاجه يعني برضه احمد عز الاي بيبيع الحديد لاسرائيل باقل من سعر البيع في مصر
بس واضح ان دي بقت سياسة الدوله المصريه انها تدعم دولة الكيان الصهيوني اسرائيل علي حساب الشعب الغلبان
هتتاكدوا من كده لما تعرفوا ان وزارة البترول بتبيع الغاز الطبيعي للمصرين ب16 جنيه حوالي 2 دولار
وسعره العالمي 10 دولار في الوقت الاي بتبيعه لدولة اسرائيل بدولار وربع كسعر ثابت لمدة 30 سنه
تصدقوا الكلام ده طبعا دي اكبر من اي مهزله واكبر من اي قفا ممكن تتصوروه
وده الاي دعا الناس علي الفيس بوك لعمل حملة المليون توقيع لوقف تصدير الغاز لاسرائيل وطبعا
الحكومه ودن من طين وودن من عجين والمصيبه ان بعد كل ده
القا قراء المدونه بيسئلوني مكتبتش ليه عن القفا
بقيت محتار هما يقصدوا اي قفا فيهم احنا شعب عايش علي الضرب في القفا
ويبقا السؤال اللزيز
حسيت بحاجه؟؟؟؟؟؟؟؟؟؟؟


4 comments:

  1. المشكلة على فكرة مش أن الشعب الطيب دا اعتاد على مساوء الحكم ولكن أن الظروف والسياسة المستخدمة بتحاول أنها تجعل كل فرد لا يفكر الا فى كيفية الحصول على الأشياء الضرورية له
    زيها زى اى سياسة قهرية تحاول اماتت أى عزيمة داخل الفرد زى مثل بسيط لو هناك انسان يحاول أعطاء كل ما يحيطون به ما يريدون من احاسيس ومشاعر واحتياجات وهؤلاء الأشخاص لا يقدرون قيمة هذا الأنسان ويحاولون ايذائه بكافة الطرق ماذا سيحدث لهذا الشخص سيصاب بخيبة الأمل ويفقد الثقة فى نفسه وفيما يحطون به
    وهذا ما حدث مع هذا الشعب يكافح ويعمل ولا يجد الا القليل حتى اصيب بخيبة الأمل واصبح ليس لديه أى احساس وان وجد يقتل فى لحظات ولكن
    مهما حدث فهذا الشعب وقفه
    واعتراض
    ومحو لكل السلبيات التى يعانيها وما هى الا وقت وسوف تنفجر القنبلة
    صرخة الغليان التى بداخل كلا منا
    كفى
    ظلم
    خداع
    الم
    قهر
    ارحمونا
    موضوع جيد

    ReplyDelete
  2. احلى حاجة في المصريين انهم فاهمين وعارفين
    ويا عيني بيحيوا كدة
    يعيشوا في دور انهم مش فاهمين
    اصل الفهم دلوقتي جريمة
    لو حد حس انك فاهم على طول تبقى ارهابي وكمان متطرف
    ويمكن تكون قريب اسامة بن لادن وعايز تخرب عقول الباقيين بافكارك
    وعلشان كدةبياخدوا الناس الوحشين اللي فيهموا دول ويحطوهم في عنبر العقلاء

    اما بالنسبة للغاز
    فاالمعلومة دي موجودة واحنا عارفينا
    دي كانت موجودة في الجرائد العامة
    يعني بيعرفونا علشان مش نعرف من برة
    ومع ذلك
    احنا شعب جميل بنؤمن بسياسة " طاطي للريح لحد ما تعدي
    " فا ايه كلنا بنطاطي
    وهما بقى يستغلوا كدة ويدونا على قفانا
    فشوية ناخد قفا العلاوة اللي رفعت الاسعار 300% طيب اقولك على موقف
    اليوم اللي ريس قال ان في علاوة 30%
    بابا كان رايح عقبال عندك للحلاق
    تخيل بقى الحلاق قال لبابا ايه
    قاله الحلاقة غليت
    فبابا قاله ليه
    قاله مش انتوا اخدتوا العلاوة
    احنا كمان لازم ناخد العلاوة
    يعني بابا بيدفع العلاوة من قبل ما ياخدها بشهر
    والجميل بقى
    اني لما سألت بابا العلاوة دي كام طلعت مبلغ فظيع
    حوالي كدة اللهم لا حسد 147.77 جنيه
    طبعا مبلغ يستحق

    احنا اخدنا على كدة وتخيل اهلنا بتربينا على كدة علشان مش يعتقلونا احنا واهالينا

    اصل اللي بيفتح يتكلم بيعتقلوه
    ومصر دلوقتي بقى فيها اماكن كتير بيعتقلونا فيها
    منها 5 نجوم ومنها على قد حاله
    على حسب انت اتكلمت في ايه وغلطت في مين

    وعلى رأي الراجل بتاع الاخبار
    ربنا يجعله عامر

    ReplyDelete
  3. عزيزتي سمايلي روز

    للاسف خيبة الامل دي واضحه مع كل موقف بنعيشه
    واضحه في الفساد الاي استشري بين الناس وبعضها
    الناس خلاص حاست ان الفساد بقا الشيء الطبيعي

    وعلشان كده مبقاش عندهم استعداد لاي شيء تاني

    لكن لازم يبقا جوانا حلم لبكره
    وامل في المستقبل
    انه يبقا اجمل وافضل

    تحياتي

    ReplyDelete
  4. هههههههههههههههههه

    عزيزتي لفلي جيرل
    للاسف الناس كلها بتدفع
    بدل ال30%
    300% بسبب كرم الحكومه مع الشعب
    المصيبه بقا ان رغم ارتفاع الاسعار
    وزير الماليه
    برضه بيقول كده الايراد مش مقضي ولازم يزودوا الاسعار تاني
    يعني ال300 هتبقا بس بدايه

    وربنا يستر علي الناس الغلابه

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد