Sunday, April 27, 2008

ماشية السنيوره

مـاشية السنيورة
كـدة كـدة اهـو
عاوزالها صورة
كـده كـده اهـو
بصت في العدسة
كـده كـده اهـو
راحت مكسورة
اهـو كـده اهـو
بيقروا عليا وبيحسدوا فيا

***
اكمن عيوني عسليّـة وبتلمع في الضي شوية
ابقي خلاص .. خلاص بقيت جنيّـة
ويقولوا علي شعري السايح
قال ايه ناعم وكمان فاتح
وانا مهما اسامح واصالح
بيقروا عليا وبيحسدوا فيا
***
يشوفوني بانشر بياضاتي
والهوا طاير بين دراعاتي
يـقـومــوا ايــه
يـفـتـكـروا ايـه
يفتكروا دول جناحاتي
ويقولوا علي وسطي رفيّع
امشي بة يبقي بيتخلّع
واسمعهم وانا كده باتدلع
بيقروا عليا وبيحسدوا فيا
***
اشتري فستان يطلع منظر
واشتري فاكهة تطلع سكر
ابقي كده .. مشعوذة
قال ايه وباعرف اسحر
ويقولوا مالها كده سرحة
وفراندة بيتهم كده برحة
وانا مهما حاولت اكون مرحة
بيقروا عليا .. وبيحسدوا فيا
***
انا شفت منام قمت حكيتة
واتحقق زي انا ما رويتة
بعدوا عني .. كشّوا مني
عشان اللي قريتة
ويقولوا علي خدي وردي
وشفايفي فراولة من البلدي
طب ليه ودة شئ مش بيدي
بيقروا عليا .. وبيحسدوا فيا
***
يا حبيبي تعالي قوام خدني
م الناس اللي بتعاندني
هاتلي بصحيح .. بساط الريح
خلي البلد تشاهدني
ويقولوا دي بنت غنية
وشقية وحلوة وذكية
والعالم كلة حواليا
يقر عليا .. وبيحسد فيا

ياه علي الذكريات الجميله
الاغنيه دي بجد ليه معاها ذكريات جميله قوي كنت دائما اسمعها وانا في الابتدائي
وكنت اتفرج علي الكليب بتعها وكان كليب كارتون وكنت بحس بمتعه كبيره قوي
والبنت بتبص في العدسه تروح العدسه مكسوره
وكنت بحب قوي الحته الاي بتقول فيها ويقواو علي وسطي رفيع
امشي بيه يبقا بيتخلع واسمعهم وانا كده بتدلع ههههههههههههه
بس للاسف الكليب الكرتون ده ملوش اي وجود علي النت
فاكر كمان ان الكليب ده كان بيجي في الفتره الاي كنت بخلع فيها سناني كنت كل يوم خميس اروح للدكتور اخلع سناني واكل ايس كريم وارجع البيت اسمع الكليب ده
وافضل فرحان واغني وارقص معاه

ماشيه السنيوره كده كده اهه


10 comments:

  1. يا سلام عليك يا تامر
    انت دايما ترجعنا لاجمل ايام عمرى
    اغانى اثرت فعلا ف وجدانى اغانى سمعتها ولسة فاكرهالغاية دلوقتى وفاكر كل لحظة عشتها معاها
    اغنية ماشية السنيورة -تستاهل- المدن-
    وكمان اغانى صفاء ابو السعود
    مش عارف اقول اية ولا اية

    ReplyDelete
  2. جميلة قوي الاغنية
    اي نعم هي مش بقيت على التليفزيون ولا موجودة على النت
    لكنها عمرها ماهتخرج من ذاكرتنا
    وخاصة الكاميار بتاعت المصوراتي اللي في الكليب الي اتكسرت
    شكرا على الذكرى الجميلة

    ReplyDelete
  3. اخي العزيز رومنسي
    اشكرك علي تعليقك الجميل
    وعايز اقول لمتابعي المدونات ان زوقنا
    في الاغاني واحد علي طول الخط
    اسمحلي احكيلهم علي موقف
    مره انا واحمد كنا ماشيين في يوم
    وبندردش فغني مقطع من اغنية تستاهل للمطربه حنان
    وفجاه طلعت الموبايل وسمعتها له
    وتحديته ان اي اغنيه بيحبها قوي عندي علي الموبايل
    وكسبت التحدي
    لان فعلا زوقنا في الموسيقي واحد

    تحياتي ليك يا احمد

    ReplyDelete
  4. عزيزتي lovly girl
    اشكرك علي تعليقك
    فعلا الكليب ده مش موجود خالص
    وانا فعلا نفسي اشوفه قوي
    انا فاكر انه كان جميل
    جدا
    خاصه المنظر بتاع العازفين الثلاثه
    وهما واقفين جنب بعض
    وبيتحركوا بشكل كوميدي جدا
    لكن ان شاء الله هواصل البحث علي النت لحد ما اوصل للكليب ده

    تحياتي

    ReplyDelete
  5. على فكرة يا تامر انت دايما بتفكرنا بحاجات جميلة قوى وعلىفكرة الكليب دا موجود واول ما شفت موضوعك تذكرت صديقتى العزيزة عشان كانت بتحب الكليب دا قوى وعشان كدا احتفظت بيه عندها على شريط فيديوا وكنا بنحب نتفرج على العازفين الثلاثة وهما واقفين وخصوصا وهانى معاهم كنت بحب اغانياته جدا وخصوصا ان لها طبع خاص والبنت كانت جميلة كنا بنحب نقلدها قوى واحنا صغيرين
    مش عارفة اقولك ايه دايما بتسعدنا بكل شئ
    ربنا يكرمك ويحققك كل ما تتمناه

    ReplyDelete
  6. اشكرك يا سمايلي روز علي التعليق الجميل ده
    واكيد الكليب ده هحصل عليه قريب قوي وان شاء الله هوريه ليكم
    وعلي فكره في موضوعات جايه كتير كلها ذكريات جميله وموضوعات كلها ذكريات

    تحياتي

    ReplyDelete
  7. الله من أجمل الكليبات اللى حبيتها وانا صغنتوته
    كان فيه كمان فى الوقت ده
    " ومتحسبوش يا بنات ان الجواز راحه
    ومتزعلوش يا بنات أن قلنا بصراحه
    أن الجواز عمره عمره ما كان راحه

    قوللنا يا نصاح
    مين فى الحياه مرتاح
    حتى الحمام اللى طاير
    عنده تعب فى الجناج

    ومهما نتعب نقول تعب الحبيب راحه"

    وكتير من الاغانى زى هم النم - والشاطر عمرو
    واغانى كتير اوى كلنا حبيناها وكبرنا عليها والحمد لله لسه فى ذاكرتنا كلنا وبنحكى عنها زى دلوقتى

    لكن تفتكروا جيل الايام دى حيكون عندهم اغانى يفكروا فيها كده زينا
    انا شايفه ان مفيش دلوقتى أغانى زى اغانى زمان

    اجمل حاجه فيك انك بتدعبس جوانا وبتفكرنا بزمان وبزكرياتنا الجميله
    اشكرك
    ونرجو المزيد

    ReplyDelete
  8. الكليب موجود على الموقع ده وممكن تحمله على جهازك كمان

    http://www.youtube.com/watch?v=JNxT1x5th3w&feature=related
    وشكرا ليك

    ReplyDelete
  9. مين الفنانه اللي بتغني معاهم في الفرقه ؟؟؟؟؟؟؟؟؟؟؟؟ بجد صوتها تحفة بس للاسف مش عارف اسمــها ؟؟؟؟؟؟؟

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد