Thursday, May 1, 2008

اول مقلت يا كومبيوتر


غريب اوي العنوان ده
اول مقلت يا كومبيوتر تعرفوا ان وقتي كله بقضيه علي النت في شغلي في بيتي وكمان حتي في الشارع من خلال الموبايل وعلشان كده انا هحكيلكم علاقتي بالتكنولوجيا وذكرياتي معاها
طبعا ذكريات جميله قوي وبدات زمان قوي لما كنت في الاعداديه ولسه يدوب بستعد للمرحله الثانويه وفي الوقت ده عمي جاب اول جهاز متطور في بيت العائله وكان جهاز كومبيوتر ومعاه كتاب كمان
وطبعا من اول لحظه في تعاملي مع جهاز زي ده حسيت بالعظمه وكنت بتعامل معاه كئنه سحر او حدث تاريخي طبعا وقتها كان عمي بيشتغل في الشرطه علي حدود مصر مع اسرائيل وبيجي سبع ايام في الشهر وكان معني كده ان الجهاز ملكي باقي ايام الشهر طبعا وقتها كنت بحب اقراء في كتلوجات الاجهزه الكهربائيه والتلفزيون وبكده كنت مؤهل للتعامل مع اول كتاب عن التكنولوجيا وكان كتاب تعليم استخدام مايكروسوف دوس وطبعا وقتها اوامر الدس كانت بالنسبه ليه زي الشفرات السحريه والتعاويز والطلاسم الي ممكن تفتح لي الباب لكشف السر الاعظم وكنت طول الوقت احفظ في اوامر استعراض الملفات وكتابة النصوص وحجات غريبه كده لحد ربنا ما فتح عليه وعرفت اذايي ادخل علي الويندوز متستغربوش وقتها برضه كان لسه الويندوز ده بيقول يا رب يا ساتر يعني ابتدينا سوا واول ما شفت الصوره بقت ازرق في ابيض بدل اسود في اسود حسيت بجمال الدنيا ولما فتحت الويندوز وشفت الصوره الاي مكتوب عليها اسمه حسيت اني في اهم لحظات حياتي وفي اسعدها في نفس ذات الوقت
لما قرائت ميكروسوفت ويندوز فور ويرك جروب 3.11 ياه علي الطفره الاي حسيت بيها
وزي مانتم شايفين في الصور قد ايه المتعه طبعا كنت بتعامل مع برامج البينت شوب والريكوردر
والفايل مانجر كئني بتعامل مع قمة التكنولوجيا واني اخيرا تخلصت من الوثنيه في الدس واتنقلت للنور
وفضلت في العالم ده 3 سنين لحد ما شافت عيوني بالصدفه جهاز مشغل ويندوز 95 طبعا
حسيت وقتها بخيبة الامل لانه كان حاجة اقوي واعظم ولاول مره عيوني تشوف قائمة ستارت
وشريط المهام طبعا مش ينفع يشتغل علي جهاز عمي المتهالك الاي كان تحفة الزمان من سنتين تلاته
لحد ما جبت اول جهاز كمبيوتر شخصي ووقتها كان الزمان عفي عن الويندوز ال 95 وظهر مفهوم جديد للتكنولوجيا مع ويندوز 98 وقتها عرفت ان الاي بيحب التكنولوجيا هو اول من يكفر بها لما ينزل تكنولوجيا احدث وطبعا بدات العجله في التحرك وظهر ويندوز ميلانيوم الاي كان بيمهد الطريق لتحفة الزمان والمكان
الويندوز اكس بي طبعا يوم ما حطيته علي جهازي صاحب البروسيسور تلات تلاتات يعني 333 والاي ميعرفش يعني ايه تلات تلاتات يبقا لسه جديد في التكنولوجيا طبعا اصاب الجهاز بالشلل
وبذلك وجب التجديد وجه الجهاز الجديد عام 2002 بسلامة الله ومعاه اقوي التطبيقات لويندوز اكس بي
ولان الطمع ثمه اساسيه لمحب التكنولوجيا مع ظهور ويندوز فيستا اعلنت العصيان ومن وقتها مشغلتش اكس بي علي جهازي الشخصي والاكس بي حكايه تانيه استنتها كتير قوي وفضلت مستنيها
بنسخ مقلده ولونج هورن ومفيش مانع نجرب مكنتوش وماك او اس وميلستون فايف وريد هات وحجات غريبه كده لحد ما ظهر الفيستا وعادة لقلبي السعاده
ولو اني بتمني دلوقتي الجديد لان الطمع هو داء التكنولوجيا
ده كان مشواري مع برامج التشغيل لسه بقا لينا حكايات تانيه كتير عن التكنولوجيا وذكرياتي معاها ورحلة مع التكنولوجيا دامت لمدة 15 سنه من عمري
ولسه مستمره لسنين وسنين جايه ان شاء الله


6 comments:

  1. هههههههههههههههههههههههههههههه

    فظيع الاسلوب اللي كاتب بيه البوست ده

    اول مرة اشوفه منك الصراحة

    بس ايه ده

    ياااااااااااااااااااااااااه
    انت قديم اوي

    فيستا ايه بس

    احدث ويندوز دلوقتي هو ويندوز سفروته

    الحق ستبه علي الجهاز

    ولو اني اشك ان جهازك يستحمله

    ReplyDelete
  2. عزيزتي سفروته
    اشكرك علي تعليقك علي الموضوع
    علي فكره انا مش متعود اكتب موضوعات المدونه بالاسلوب ده
    بس بفكر اعمل تصنيف جديد واقدم فيه اعمال ساخره وبالعميه زي موضوع بيع يا محمود والموضوع ده

    امبا بالنسبه لويندوز سفروته
    فده اكيد مش معقول للبنادميين
    ده للسفاريت
    والسفاريت هيكونوا موضع بوست قريب

    تحياتي

    ReplyDelete
  3. يااااااه
    كلامك ده فكرنى بزمن جميل
    ايام الدراسه وانا فى الاعدادى
    وفت ما كان بيجى وقت حصه الكمبيوتر
    ويااااه على الوقت ده كان الكل بيتيسابق ليتمكن من الانفراد بجهاز مستقل بيه فى المعمل ليطبق عليه اخر الاوامر اللى عرفها فى الدوس
    فكرتنى اد ايه كانت حاجه عويصه جدا وفتها الاوامر دى
    واد ايه عقلنا كان بيحاول يستوعبها
    لكن انا سقطت منىمرحله فى الويندوز لانى ابتديت فى البيت عندى من وينودز 95
    وبدأ التطور التكنولوجى عندنا ياخد مجراه
    المهم ان موضوعك ده فكرنى بايام الدراسه وبأوامر الدوس اللى كنت نسياها خالص


    تنويه: بعتذر عن عدم تعليقى بأنتظام على موضوعاتك لكن ابدى اعجابى بالتقدم اللى فيه المدونه بتاعتك ومزيد من التقدم ان شاء الله فى الايام الجايه

    ReplyDelete
  4. عزيزتي ضي القمر
    حمدلله علي السلامه غياب طويل فعلا
    عايز اقول ان ضي القمر كانت من اهم المتبعين للمدونه عندي
    واكثرهم حرصا علي التعليق
    حمدلله علي السلامه بعد الانقطاع الطويل ده ويارب تفضلي باستمرار تسعدينا بتعليقاتك الجميله

    اما بالنسبه لرحلتك مع التكنولوجيا
    للاسف مكنش عندنا في مدرستنا معمل كمبيوتر بس اناعوضت ده بكمبيوتر عمي
    بس واضح انك بداتي برضه ايام ويندوز 95 يعني ايام العصر الذهبي لقائمة ستارت

    تحياتي
    ويسعدني دائما قرائة تعليقاتك في بيتك مدونة انسان عاشق حر

    ReplyDelete
  5. شكرا قوي انك فكرتني بميس ايمان
    اه يا جماعة ملحوظة
    ميس ايمان دي ميس الكمبيوتر بتاعتي
    كان في مدرستي الاعدادي
    اللي يدخل معمل الحاسب الالي لازم يكون من الطلبة المتفوقين
    وكان وقتها برضه كنا يا دوب نتعامل مع الكمبيوتر اوائل اوامر الدوس
    انا مش كبيرة قوي بس كان في ويندوز 95 في المعمل
    انا شوفته وقتها لما كتبت الامر win
    وضغط enter من لوحة المفاتيح
    مش قادرة اقول على الفرحة اللي كنت فيها لما شفت الشاشة ملونة
    ياااااااااااه متعة ما بعدها متعة يا جماعة
    بس طبعا الامر ده مش كان مع اي حد في فصلي
    وبدات اول برنامج اتعلمه هو برنامج الرسام
    وعملت وقتها طيارة طانت حلوة قوي
    واخدت عليها شهادة تقدير من المديرة
    علشان الطيارة طبعا
    ولما دخلت الثانوية
    اخدت باقي اوامر الدوس
    وبرضه كان معايا مصباح علاء الدين اللي هو ايه WIN
    وبعدها قرت اني لازم اتعلم الكمبيوتر
    وبالفعل بدأت
    والطمع التكنولوجي غلاب بقى


    شكرا على الموضوع الجميل
    اللي رجعني لزكياتي مع معمل الحاسب
    في مدرستي الجميلة

    ReplyDelete
  6. انت عارف انت رجعتنى لفترة جميلة قوى من عمرى وهى حكايتى مع الكمبيوتر وازاى هو غير مجرى حياتى بعد ما كنت هدفى الأول التدريس فى الجامعة واستكمال دراساتى وبسبب حبى الكبير للكمبيوتر بجانب الشعر بدات أخد دورات فى الدوس وبعدها الويندوز واستكملت مشوارى معاه لحد ما حصلت على icdl
    وبدأت أدرسها فى أحد المراكز المتخصصة وبعدها بدأت فى الويب ديزين وعملت المنتدى الخاص بى وبعد ذلك اقوم بدراسة برامج الأوركل
    وبحاول أعمق دراستى فى معظم مجالاته
    وعلى فكرة فكرتنى بانسان غالى عليه قوى كان وعدنى انه يساعدنى من فترة فى بعض البرامج لكن الفرصة لم تسمح له بذلك
    المهم عاوزة اقولك ان الكمبيوتر ممكن يغير مسار حياة الفرد وذلك ما حدث معى دايما موضوعات جميلة
    دايما مستمر

    ReplyDelete

باضافة تعليق انت تساهم في اثراء الحوار
وتعرض وجهة نظرك التي سيستفيد منها الاخر
بالتاكيد